Markaziy bank inflyatsiyaning pasayishda davom etishiga ham, tashqi omillar sabab narxlar oshish xavfiga ham tayyor boʻlishi kerak, dedi regulyator rahbari Timur Ishmetov Silk Road Finance & Technology Forum’da.
«Markaziy bank faoliyati xatarlar bilan bogʻliq. Ular hamisha mavjud. Balki, shu xatarlar boʻlmaganida Markaziy bankning oʻzi ham kerak boʻlmas edi. Shuning uchun biz oddiy xatarlarni boshqarishdan doimiy shoklar va noaniqliklarga yaxshiroq tayyor turishga oʻtishimiz kerak. Barqarorlikka eʼtibor qaratishimiz zarur», - dedi Timur Ishmetov.
MB raisi inflyatsiya pasayishiga ham, narxlar oshishiga ham tayyor turish kerakligini taʼkidlab oʻtdi.
«Markaziy bank inflyatsiya pasayadimi yoki uning oshishiga olib keladigan xavflar yuzaga keladimi, tayyor boʻlishi kerak. Biz har ikki yoʻnalishda ham qatʼiy chora koʻrishga va har qanday holatda oʻz vazifamizni bajarishda davom etishimiz kerak», dedi u.
Ishmetovning qoʻshimcha qilishicha, hozirgi davr yuqori noaniqlik va tashqi taʼsirlar koʻpligi bilan ajralib turibdi. Bunday sharoitda Markaziy bank turli xavflarga tayyor turishi kerak. Jahon bozoridagi vaziyat vaqt oʻtishi bilan Oʻzbekiston ichki bozoridagi narxlarga ham oʻz taʼsirini koʻrsatishi mumkin. Regulyator ikkilamchi taʼsirlar ehtimolini kuzatyapti.
