Turizm qoʻmitasi bayram kunlarida aholining Oʻzbekiston boʻylab sayohat qilish imkoniyatlarini kengaytirish va ichki turizmni ragʻbatlantirish maqsadida qoʻshimcha transport qatnovlarini tashkil etish boʻyicha chora-tadbirlar rejasi ishlab chiqilganini maʼlum qildi.
Temiryoʻl transportida «Toshkent–Xiva–Toshkent», «Toshkent–Qoʻngʻirot–Toshkent», «Toshkent–Shovot–Toshkent», «Toshkent–Termiz–Toshkent» va «Toshkent–Sariosiyo–Toshkent» yoʻnalishlaridagi poyezdlarga 4 tagacha qoʻshimcha vagon ulanadi.
Bundan tashqari, «Toshkent–Samarqand–Toshkent», «Toshkent–Buxoro–Toshkent» va «Toshkent–Urganch–Toshkent» yoʻnalishlarida yuqori tezlikda harakatlanuvchi elektropoyezdlarning qoʻshimcha qatnovlari tashkil etiladi.
Ushbu qoʻshimcha poyezdlar bayramdan ikki kun oldin qatnay boshlaydi va bayramdan keyingi ikki kun davomida ham harakatlanadi.
Avtomobil transportida esa barcha viloyatlararo yoʻnalishlarda qoʻshimcha avtobuslar qatnovi yoʻlga qoʻyiladi.
Toshkent–Janubiy temiryoʻl vokzali hududida viloyatlararo avtobuslar uchun zaxira toʻxtash joyi ajratiladi. Bayramdan kamida uch kun oldin «Toshkent–Samarqand–Buxoro–Urganch–Nukus» yoʻnalishlaridagi zaxira avtobuslari shu yerga joylashtiriladi.
Havo qatnovlari ham koʻpaytiriladi. Bayramdan kamida ikki kun oldin «Toshkent–Urganch», «Toshkent–Nukus», «Toshkent–Buxoro» va «Toshkent–Termiz» yoʻnalishlarida qoʻshimcha aviareyslar amalga oshiriladi.
Rasmiylarga koʻra, qoʻshimcha transport qatnovlari bayram kunlarida hududlarga sayohat qilishni yengillashtirish, ichki turizmni rivojlantirish va tarixiy, madaniy hamda tabiiy turistik maskanlarga tashrif buyuruvchilar uchun qulaylik yaratishga qaratilgan.
