UEFA FIFA prezidenti Janni Infantinoga qarshi Shveysariya sudiga jinoiy daʼvo kiritish niyatida. Bu haqda 27-avgust kuni xalqaro OAV xabar berdi.
Germaniyaning SID sport axborot agentligi qoʻlga kiritgan 60 sahifalik hujjatga koʻra, daʼvo FIFA tomonidan rad etilgan reja bilan bogʻliq. Unda futbol turnirlarining, jumladan jahon chempionatlarining ayrim tijoriy huquqlarini xususiy investorlarga berish koʻzda tutilgan.
SID maʼlumotiga koʻra, UEFA va boshqa manfaatdor tomonlar Infantino, ehtimol, FIFAning boshqa funksionerlari va maslahatchilariga nisbatan ham Shveysariya Jinoyat kodeksining 158-moddasi doirasida daʼvo kiritishga tayyorlanmoqda. Ushbu modda ishonch bildirilgan mol-mulk yoki manfaatlarni boshqarishdagi jinoiy suiisteʼmol holatlariga taalluqli.
Agar Infantino FIFA manfaatlariga qasddan zarar yetkazish maqsadida harakat qilgani isbotlansa, u 5 yilgacha ozodlikdan mahrum etilishi mumkin.
UEFA AQSH sudlariga ham murojaat qilib, ish uchun zarur hujjatlarni taqdim etishni soʻragan. Ular orasida FIFA va Infantino rejasida asosiy investor sifatida koʻrsatilgan Thrive Capital investitsiya kompaniyasiga oid materiallar ham bor.
UEFA mazkur hujjatlardan keyinchalik Shveysariyada ehtimoliy jinoiy ish boʻyicha dalil sifatida foydalanishni rejalashtirmoqda.
«Kommersant» maʼlumotiga koʻra, Thrive Capital kompaniyasi Joshua Kushnerga tegishli. U AQSH prezidenti Donald Trampning kuyovi Jared Kushnerning ukasi hisoblanadi.
Daʼvo tashabbuskorlarining fikricha, FIFAning xalqaro turnirlarga oid tijoriy huquqlarining bir qismini sotish rejasi Infantino va cheklangan doiradagi boshqa shaxslarga tashkilotning eng qimmatli aktivlaridan uzoq muddat davomida manfaat koʻrish imkonini berishi mumkin edi. Ular bunday sxema FIFA, uning aʼzolari va futbol tizimidagi boshqa ishtirokchilar manfaatlariga zarar yetkazishi mumkinligini taʼkidlamoqda.
SID yozishicha, keyinchalik FIFA UYeFAga bunday sxemalar boshqa taklif qilinmasligi haqida yozma kafolat bergan.
Shundan soʻng, 27-avgust kuni UEFA Yevropa jamoalari tomonidan avvalroq eʼlon qilingan FIFA turnirlarini kelgusi mavsumda boykot qilish rejasidan voz kechgan.
