Modi va Putin 11-sentabr kuni Nyu-Dehlida ikki tomonlama uchrashuv oʻtkazdi. Hindiston Tashqi ishlar vazirligi maʼlumotiga koʻra, muzokaralarda Hindiston–Rossiya munosabatlari bilan bir qatorda Ukrainadagi urush masalasi ham muhokama qilingan.
«Muloqot va diplomatiya - mojarolarni hal qilishning toʻgʻri yoʻli», deya Modining soʻzlarini keltirgan Hindiston TIV.
Uchrashuv 12–13-sentabr kunlari Hindiston poytaxtida boʻlib oʻtadigan BRIKS sammiti arafasida oʻtkazildi.
Hindiston Rossiya neftining yirik importchilaridan biri hisoblanadi. Mamlakat Rossiyadan don mahsulotlarini ham xarid qiladi. Shu sababli Ukrainadagi urush oqibatida Qora dengizda kema qatnovining izdan chiqishi Hindiston manfaatlariga ham taʼsir koʻrsatmoqda.
Jumladan, iyul oyida Odessa yaqinida yuk kemasiga Rossiya raketa zarbasi oqibatida toʻrt nafar hindistonlik dengizchi halok boʻlgan. Shundan soʻng Hindiston Tashqi ishlar vazirligi Rossiyaning mamlakatdagi muvaqqat ishlar vakilini chaqirtirgan edi.
Modi Putinni ikki hafta ichida ikkinchi bor tinchlikka chaqirdi
Bu Modining soʻnggi ikki hafta ichida Putinga Ukrainadagi urushni tugatish masalasida ikkinchi bor murojaat qilishidir.
31-avgust kuni Bishkekda Shanhay hamkorlik tashkiloti sammiti arafasida oʻtkazilgan uchrashuvda ham Hindiston bosh vaziri Rossiya prezidentini harbiy harakatlarni tugatishga chaqirgan.
Oʻshanda Modi «cheksiz urushdan urushning yakuniga, harbiy harakatlarning tugashiga oʻtish kerak»ligini aytgan. Putin esa Rossiya goʻyo bu yoʻnalishda «harakatlanayotgani»ni bildirgan.
Hindiston Ukrainada keng koʻlamli urush boshlanganidan keyin ham Rossiya bilan iqtisodiy aloqalarini saqlab qoldi va Rossiya neftini faol xarid qilishda davom etdi. Bloomberg maʼlumotlariga koʻra, Gʻarb sanksiyalari ostidagi ayrim tovarlar, jumladan Rossiya harbiy sanoati uchun zarur boʻlgan mikrochiplar va dastgohlar ham Hindiston orqali Rossiyaga yetkazilgan.
Ayni paytda Gʻarb davlatlari rahbarlarining Moskva tinchlik muzokaralariga qanchalik tayyor ekani haqidagi baholari farq qilmoqda.
Germaniya kansleri Fridrix Mers 9-sentabr kuni Rossiya hukumati va prezidentining Ukraina boʻyicha jiddiy tinchlik muzokaralariga kirishishga tayyorligini koʻrsatuvchi belgilarni kam koʻrayotganini aytgan.
