Mayami xalqaro aeroportida Amazon kompaniyasining Boeing 767 rusumli yuk samolyoti bilan bogʻliq yirik aviatsiya hodisasi yuz berdi. Avariya oqibatida kamida besh kishi halok boʻlgan.
Mayami-Deyd okrugi yongʻin-qutqaruv xizmati rahbari Rey Jadallaning maʼlum qilishicha, yana besh kishi turli darajada jarohat olgan. Ulardan uch nafari ogʻir ahvolda shifoxonaga yetkazilgan.
Dastlabki maʼlumotlarga koʻra, samolyot Puerto-Rikodan Mayamiga uchib kelayotgan boʻlgan. U aeroportga qoʻnish vaqtida uchish-qoʻnish yoʻlagidan chiqib ketgan va bir nechta toʻxtab turgan avtomobillarga borib urilgan. Shundan soʻng samolyotda yongʻin boshlangan.
Toʻqnashuv oqibatida ayrim jabrlanganlar avtomobillar ichida qisilib qolgan.
Qutqaruv ishlariga 60 dan ortiq yongʻin oʻchirish mashinasi jalb qilindi
Hodisa joyida keng koʻlamli qutqaruv operatsiyasi oʻtkazilgan. Unda 60 dan ortiq yongʻin oʻchirish va qutqaruv texnikasi ishtirok etgan.
Qutqaruvchilar samolyot ichida qolib ketgan birinchi va ikkinchi uchuvchini ham olib chiqish boʻyicha ish olib borgan. Biroq mahalliy yongʻin xizmati rahbari uchuvchilarning avariyadan keyingi ahvoli haqida maʼlumot bermagan.
Hodisa sabablari hozircha aniq emas.
Avariya yuzasidan AQSH Federal aviatsiya maʼmuriyati (FAA) va Transport xavfsizligi milliy kengashi (NTSB) tekshiruv boshlagan.
Flightradar24 maʼlumotlariga koʻra, samolyot uchish-qoʻnish yoʻlagidan chiqib ketgan vaqtda uning tezligi soatiga taxminan 207 kilometr boʻlgan.
Aeroportda barcha uchish-qoʻnish yoʻlaklari vaqtincha yopildi
Avariyadan keyin Mayami xalqaro aeroportidagi barcha uchish-qoʻnish yoʻlaklari vaqtincha yopilgan.
Bir necha soatdan keyin aeroport yoʻlovchilarga parvozlar jadvalidagi oʻzgarishlar va reyslarning boshqa vaqtga koʻchirilishi haqidagi maʼlumotlarni toʻgʻridan toʻgʻri aviakompaniyalardan aniqlashni tavsiya qilgan.
Amazon ham hodisa yuzasidan bayonot berib, samolyot qoʻnish vaqtida «insident»ga uchraganini maʼlum qilgan, biroq uning tafsilotlarini ochiqlamagan.
Kompaniya matbuot kotibi Kelli Nantelning bildirishicha, Amazon voqea qanday sodir boʻlganini aniqlash uchun mahalliy hokimiyat va tegishli idoralar bilan yaqin hamkorlik qilmoqda.
