Xiva va Buxoro oʻrtasida yangi elektropoyezd qatnovi yoʻlga qoʻyiladi. 210 ming dollar evaziga tuman hokimi qilishga vaʼda bergan shaxs ushlandi. 100 trillion soʻmlik davlat mulki xususiylashtiriladi. Transport nazoratida bodi-kameradan foydalanish boshlandi. 25 bolani tashiyotgan Damas haydovchisi ushlandi. Kunning muhim yangiliklari bilan tanishtiramiz.
Xiva va Buxoro oʻrtasida yangi elektropoyezd qatnovi yoʻlga qoʻyiladi
9-sentabrdan boshlab Xiva va Buxoro oʻrtasida yangi elektropoyezd qatnovi yoʻlga qoʻyiladi, deb xabar berdi «Oʻztemiryoʻlyoʻlovchi» AJ. Qayd qilinishicha, qatnov tezyurar CRRC-Daliyan yoʻlovchi elektropoyezdida amalga oshiriladi. Uning tarkibi 5 ta vagondan iborat boʻlib, jami 415 ta ekonom-klass oʻrindigʻi mavjud.
707-sonli «Xiva - Buxoro-1» elektropoyezdi seshanbadan tashqari haftaning barcha kunlari harakatlanadi. Poyezd Xivadan soat 9:55 da yoʻlga chiqib, Buxoroga soat 14:32 da yetib boradi.
706-sonli «Buxoro-1 - Xiva» elektropoyezdi dushanbadan tashqari haftaning barcha kunlari harakatlanadi. Poyezd Buxorodan soat 15:45 da yoʻlga chiqib, Xivaga soat 20:25 da yetib boradi.
210 ming dollar evaziga tuman hokimi qilishga vaʼda bergan shaxs ushlandi
Fargʻonada tuman hokimi lavozimiga ishga joylashtirib qoʻyishni vaʼda qilgan shaxs tezkor tadbirda qoʻlga olindi.
Maʼlum qilinishicha, S.A. boshqa bir fuqaroga oʻzini hakamlik sudi sudyasining yordamchisi deb tanishtirib, goʻyoki yuqori lavozimda ishlovchi tanishlari orqali 210 ming dollar evaziga uni Uchkoʻprik tumani hokimi lavozimiga ishga joylashtirib qoʻyishini aytgan.
S.A. kelishilgan puldan 100 ming dollarini olganda departamentning Fargʻona viloyati boshqarmasi va boshqa huquqni muhofaza qiluvchi organ xodimlari hamkorligida oʻtkazilgan tezkor tadbirda ushlangan.
100 trillion soʻmlik davlat mulki xususiylashtiriladi
Prezident farmoniga muvofiq, xususiylashtirish dasturi doirasida 84 ta xoʻjalik jamiyatidagi davlat ulushi, 1242 ta koʻchmas mulk obyekti hamda tadbirkorlik va shaharsozlik maqsadlari uchun qariyb 8 ming gektar yer uchastkasi savdoga chiqarilishi rejalashtirilmoqda.
Shuningdek, davlat ishtirokidagi 85 ta korxona tugatiladi yoki qayta tashkil etiladi. Bundan tashqari, ilgari sotilmagan 84 ta aktiv boshlangʻich narxi 1 million soʻm etib belgilanib, qayta auksionga chiqariladi.
2027-yil yakunigacha savdoga qoʻyiladigan ayrim davlat aktivlari quyidagilardan iborat: Andijon mexanika zavodi (100 foiz ulushi); Yoʻlovchi vagonlarini qurish va taʼmirlash zavodi (90 foiz ulushi); Humo Air aviakompaniyasi (100 foiz); Oqtosh pansionati (100 foiz); Chust dehqon bozori (51 foiz ulushi); Yangiqoʻrgʻon dehqon bozori (51,42 foiz); Toʻraqoʻrgʻon markaziy dehqon bozori (51 foiz); Toyloq dehqon bozori (51 foiz); Jarqoʻrgʻon dehqon bozori (54,6 foiz); Qibray dehqon bozori (51 foiz); Rapqon dehqon bozori (51 foiz); Yakkatut dehqon bozori (52,1 foiz).
Davlat aktivlarini boshqarish agentligi xabariga koʻra, savdoga chiqariladigan aktivlarning umumiy qiymati 100 trillion soʻmni tashkil etadi. Ularni realizatsiya qilishdan yil yakuniga qadar kamida 14 trillion soʻm tushum olish kutilmoqda.
Transport nazoratida bodi-kameradan foydalanish boshlandi
Transport nazorati inspeksiyasining Avtomobil transportida nazorat boshqarmasi Toshkent shahri va Toshkent viloyati hududiy boʻlimlarida faoliyat yuritayotgan inspektorlar nazorat-reyd tadbirlarida bodi-kameradan foydalanishni boshladi.
Yangi amaliyot nazorat jarayonlarini zamonaviy texnologiyalar asosida tashkil etish hamda inspektorlar faoliyatining shaffofligini oshirishga qaratilgani taʼkidlanmoqda.
Maʼlum qilinishicha, bodi-kameradan foydalanish amaliyoti keyinchalik Transport nazorati inspeksiyasining boshqa hududiy boʻlimlarida ham bosqichma-bosqich joriy etiladi.
25 bolani tashiyotgan Damas haydovchisi ushlandi
Haydovchidan tashqari 6 nafar yoʻlovchi sigʻadigan Damas avtomobilida oʻnlab bolani tashish davom etmoqda. Bu safar Toshkent shahri Yashnobod tumanida haydovchi 25 nafar bogʻcha bolasini olib ketayotganda toʻxtatildi.
Aniqlanishicha, mazkur haydovchi avvalroq mashinani mast holda boshqargani uchun sud hukmi bilan transport vositalarini boshqarish huquqidan mahrum boʻlgan. Poytaxt YHXB eʼlon qilgan videoda haydovchi qilgan ishidan pushaymonligini bildirgan.
Damas jarima maydonchasiga joylashtirilgan. Haydovchiga nisbatan maʼmuriy bayonnoma rasmiylashtirilgan.
