Andijon viloyatida Favqulodda vaziyatlar boʻlimi mansabdori pora olishda gumonlanib, ushlandi. Bu haqda Bosh prokuratura huzuridagi departament xabar berdi.
Maʼlum qilinishicha, departamentning Andijon viloyati boshqarmasi va boshqa huquqni muhofaza qiluvchi organ xodimlari hamkorligida tezkor tadbir oʻtkazilgan. Unda Shahrixon tumani Favqulodda vaziyatlar boʻlimi boshligʻi oʻrinbosari B.G. hududdagi MChJlardan birining ish yurituvchisidan 1,5 mln soʻm olgan vaqtida ushlangan.
Mansabdor ushbu pul evaziga umumiy ovqatlanish shoxobchasida kelgusida tekshiruv oʻtkazmaslik va tekshiruvchilar kelgan taqdirda uning foydasiga hal qilib berishni vaʼda qilgan.
Holat yuzasidan Jinoyat kodeksining 210-moddasi (pora olish) bilan jinoyat ishi qoʻzgʻatilgan. Hozirda tergov harakatlari oʻtkazilmoqda.
Avvalroq Qiziriqda Savdo-sanoat palatasi boʻlimi boshligʻi ushlangandi.
