Portugaliya Norvegiyani safarda magʻlubiyatga uchratdi. Bu oʻyinda barcha Ronaldu va Holand qarama-qarshiligini koʻrmoqchi edi, ammo portugallarning yangi bosh murabbiyi Jorji Jezush Krishtianu Ronalduni zaxirada qoldirdi. Uning oʻrniga asosiy tarkibda tushgan Gonsalu Ramush esa gʻalaba golini urdi.
Portugallar 17-daqiqadayoq hisobni ochishdi: Joau Feliks jarima maydoni tashqarisida toʻpni Pedru Netudan qabul qildi va taxminan 16 metr masofadan turib, qaytarib boʻlmas zarba yoʻlladi. Keyin esa Holand oʻta qulay pozitsiyada turganiga qaramay, Edegorning ajoyib pasini yoʻqqa chiqardi.
Bir necha xatolardan keyin Erling baribir oʻz maqsadiga erishdi va 51-daqiqada jarima zarbasidan keyin hisobni tenglashtirdi. Holand qatorasiga yettinchi oʻyinda gol urmoqda. «Siti» forvardi joriy mavsumda klub va milliy jamoa safidagi 9 oʻyinda urgan gollari sonini 10 taga yetkazib qoʻydi.
Ammo portugallar baribir gʻalabani ilib ketishdi – hisob tenglashganidan koʻp oʻtmay mezbonlar darvozaboni Eryan Nyuland qoʻpol xatoga yoʻl qoʻydi. U toʻpni Ramushga topshirib qoʻydi, Ronalduning raqobatchisi esa texnik ijro bilan toʻpni darvozabon ustidan oshirib tashladi.
Ramush shu kuni dublga erishishi mumkin edi, ammo uning ikkinchi goli ofsayd tufayli bekor qilindi.
Oʻyin oxirida esa mezbonlar uchun yana bir yoqimsiz holat kuzatildi. Jamoa sardori, «Arsenal» futbolchisi Martin Edegor himoyadan toʻp bilan chiqayotganida «Siti» sobiq futbolchisi Bernardu Silva uning oyoqgʻiga qasddan zarba berdi, jabrlanuvchi oʻyinni oqsoqlangancha davom ettirdi, ammo boshqa yugura olmadi.
Mavzuga oid
Ronaldu esa chigalyozdi mashqlarini bajarib turgan boʻlsa-da, shu kuni baribir maydonga tushirilmadi. U 2024-yil iyunidan buyon ilk bor oʻyin qaydnomasiga kiritilgan boʻlsa-da, maydonga tushmadi. Bu oraliqda u 27 oʻyinda boshlangʻich tarkibda tushgan, bir marta zaxiradan oʻyinga qoʻshilgandi.
Oʻyindan keyin Jorje Jezush Ronalduni maydonga tushirmaganini shunday izohladi:
Uni yarim soatga maydonga tushirishni oʻylagandim, ammo oʻyin davomida boshqacha vaziyatlar yuzaga keldi. Men uni maydonga tushiradigan qulay vaqt emas deb hisobladim. Oldinda yana ikkita oʻyinimiz bor. Bu uni avaylaganimdan emas, u men xohlagancha daqiqa oʻynashga tayyor edi. Bu mening qarorim edi. Menga maydonda boshqacha xususiyatlarga ega boʻlgan futbolchi kerak boʻldi. Ammo bu Ronaldu endi rejalarimga kirmaydi, degani emas – aksincha. Ehtimol, endi u Daniyaga qarshi oʻyinda maydonga tushar.
Portugaliya usiz guruhda qatorasiga ikkinchi gʻalabasiga erishdi va guruh peshqadamligini oʻz qoʻliga oldi.
Daniya Uelsga qarshi oʻyinni bir-biriga oʻxshash gollar bilan hal qildi: standart vaziyatlardan ikki uzatma va ikkisi ham deyarli bir nuqtadan – ikki gol. 53-daqiqada britaniyaliklar himoyachisi Ben Devis oʻz darvozasini ishgʻol etib qoʻydi, 66-daqiqada Gustav Isaksen jarima maydonida barchadan ildamroq harakat qilib, ikkinchi golni urdi.
Shu bilan birga, bu oʻyin daniyaliklar uchun yoqimsiz yoʻqotish bilan ham yodda qoldi. 30-daqiqada «Manchester Yunayted» himoyachisi Patrik Dorgu raqib jarima maydonida toʻpga zarba berish vaqtida jarohat oldi. Toʻpigʻini ushlagancha gazonga yiqilgan futbolchi oʻyinni davom ettira olmadi va oqsoqlanib maydonni tark etdi.
Niderlandiya Serbiya ustidan gʻalabaga erishdi. AZ Alkmar klubining 23 yoshli hujumchisi Meks Merdink dublni rasmiylashtirdi: milliy jamoada ikkinchi oʻyinida maydonga tushgan futbolchi birinchi boʻlimda penaltidan hisobni ochdi, tanaffusdan keyin esa gʻalaba golini urdi.
Ammo bu oʻyin ham jarohatsiz kechmadi. Oʻyinning 17-daqiqasidayoq «Liverpul» hujumchisi Kodi Gakpo Sasha Lukich ishlatgan podkatdan keyin toʻpigʻini ushlagan holda gazonga oʻtirib oldi. Shifokorlar tomonidan birinchi yordam koʻrsatilganidan keyin oʻz oʻrnini Ruben van Bommelga boʻshatib berdi.
U Niderlandiya milliy jamoasining yigʻinda jarohat olgan uchinchi hujumchisi boʻldi. Dastlab mashgʻulot vaqtida «Roma» hujumchisi Doniel Malen safdan chiqqandi. Oʻtgan turda Germaniyaga qarshi oʻyinda esa «Sanderlend» hujumchisi Brayan Brobbi ham jarohat oldi.
Germaniya kutilmaganda greklarga yutqazib qoʻydi – 0:1. Ikkinchi boʻlimda zaxiradan tushgan Dimitris Kurbelis 74-daqiqada oʻyindagi yagona golni urdi. Bu mehmonlarning oʻyin davomida darvoza sohasiga toʻgʻri borgan yagona zarbasi edi. Germaniya esa 16 ta zarbadan (beshtasi darvoza sohasiga toʻgʻri borgan) birorta gol ura olmadi.
Nemislar shu kuni toʻpga egalik qilish boʻyicha yaqqol ustunlik qilishdi (76 foiz), faolroq harakatlanishdi, ammo yutqazishdi. Yurgen Klopp milliy jamoada hamon ilk gʻalabasiga erisha olmadi, oʻtgan turda Niderlandiyaga qarshi oʻyinda soʻnggi daqiqalarda gʻalaba qoʻldan chiqarilgandi (1:1).
1-oktabr. Germaniya – Serbiya, Gretsiya – Niderlandiya.
Guruh peshqadamini aniqlash uchun oʻtkazilgan oʻyinda Avstriya Kosovoni magʻlub etdi. 23-daqiqada himoyachi David Affengruber qanotdan oshirilgan uzatmani golga aylantirdi, 45+1-daqiqada Junior Adam qarshi hujumni gol bilan yakunladi. Birinchi boʻlimdayoq hisob yirik koʻrinish olishi mumkin edi, ammo yakkama-yakka vaziyatga chiqib borgan Vimmer ikkilanib qoldi va zarba berish oʻrniga manzilsiz uzatma berib, toʻpni yoʻqotdi. Lekin ikkinchi boʻlimda zaxiradan tushgan Karni Chukvuemeka baribir uchinchi golni urdi. Ikkinchi boʻlim davomida faolroq harakatlangan kosovoliklar ham oʻzlari haqli boʻlgan javob golini urishdi – oʻyin oxirlarida Edon Jegrova penaltini aniq ijro etdi.
Endi ikki turda ham bir xil 3:1 hisoblarida gʻalaba qozongan Avstriya guruhda peshqadamlik qilmoqda.
Irlandiya yilning eng mojaroli oʻyinida Isroilni yirik hisobda taslim etishdi – 3:0. Oʻyin siyosiy aksiya bilan boshlandi: irlandlar Isroil madhiyasi yangrayotganida boshlarini egib olishdi, keyin esa raqib bilan qoʻl berib koʻrishishdan bosh tortishdi. Madhiyalardan keyin ikki jamoa futbolchilari ham jamoaviy suratga tushish uchun ortga burilishdi. Qolaversa, irlandlar shu kuni oʻyinga qora bogʻich taqqan holda tushishdi.
Maydonda esa intriga boʻlmadi. Irlandiya barchasini dastlabki 25 daqiqada hal qilishdi. Troy Perrott avvaliga toʻpni darvozabonning oyoqlari orasidan oʻtkazib hisobni ochdi, keyin esa Adam Ida darvozabon bilan yakkama-yakka vaziyatga chiqib borib, hisobdagi farqni oshirdi, keyin yarimhimoyachi Jek Moylan yakuniy hisobni oʻrnatdi.
Litva va Ozarboyjon oʻzaro oʻyinda durang qayd etdi – 1:1. Ikki gol ham dastlabki 15 daqiqalikda urildi. Litvaliklar Armandas Kuchisning penaltidan urgan goli evaziga hisobni ochgandi. Koʻp oʻtmay mehmonlar darvozabon xatosidan unumli foydalandi: Maxir Emreli toʻpni Jyugas Bartkusning oyoqlari orasidan oʻtkazdi. Kiper raqib futbolchisi oʻgirilgan holda yoʻllagan kuchsiz zarbani oʻtkazib yubordi.
1-oktabr. Ozarboyjon – Lixtenshteyn.
D ligasi, 1-guruh
Gibraltar – Andorra 0:0
Shu kuni faqat Gibraltar va Andorra oʻyinida gol urilmadi – 0:0. Andorraliklar faolroq harakatlanishdi va zarbalar boʻyicha 10:5, golli vaziyatlar boʻyicha 4:0 koʻrinishida ustunlik qilishdi. Ammo mehmonlar vaziyatlardan foydalanishda oqsashdi va hisob ochilmay qoldi.
