Bu hukumatning 2026-yil 24-sentabrdagi 513-son qarorida nazarda tutilgan.
«Yangi agronom» tayyorlash tizimi doirasidagi oʻquv amaliyotiga Toshkent davlat agrar universiteti va qishloq xoʻjaligi sohasi uchun mutaxassislar tayyorlaydigan boshqa oliy taʼlim tashkilotlarining tegishli yoʻnalishlarida oʻqiyotgan 2- va 3-bosqich talabalari jalb etiladi.
Ishtirokchilar tanlov asosida saralanadi. Tanlov oliy taʼlim tashkilotlarida har yili kamida bir marta oʻtkaziladi.
Amaliyotni aʼlo baholar bilan tamomlagan talabalar orasidan maxsus komissiya saralab olgan nomzodlar ilgʻor tajribani oʻrganish uchun xorijiy davlatlarga yuboriladi.
Har bir «ustoz»ga 20 tagacha xoʻjalik biriktiriladi
«Ustoz-shogird» tizimi doirasida Qoraqalpogʻiston Respublikasi Vazirlar Kengashi va viloyatlar hokimliklari paxtadan gektariga 50–60 sentnerdan yuqori hosil olgan ilgʻor agroklasterlar va fermer xoʻjaliklarini «ustoz» sifatida tanlovda qatnashishga taklif etadi.
Tanlab olingan har bir agroklaster yoki fermer xoʻjaligiga paxta hosildorligi gektariga 30 sentnerdan past boʻlgan 20 tagacha fermer xoʻjaligi «shogird» sifatida biriktiriladi.
Har hosil yili yakunida «shogird» xoʻjalik paxtadan gektariga 50 sentnerdan yuqori hosil olsa, unga biriktirilgan «ustoz» agroklaster yoki fermer xoʻjaligi mukofotlanadi. Mukofot miqdori ushbu natijaga erishgan har bir «shogird» xoʻjalik uchun 5 million soʻmni tashkil etadi.
Tizim doirasidagi ishlar Qishloq xoʻjaligi vazirligining «Raqamli qishloq xoʻjaligi» yagona integratsion platformasi orqali nazorat qilinadi. «Ustoz» va ularga biriktirilgan «shogird» xoʻjaliklar reyestrini ham vazirlik yuritadi.
