Bolaga nisbatan jinsiy jinoyatlar uchun umrbod qamoq jazosi Senatda maʼqullandi
Oliy Majlis Senatining 2-oktabr kuni boʻlib oʻtgan yalpi majlisida bolani zoʻravonlikning barcha shakllaridan himoya qilish tizimini takomillashtirishga qaratilgan qonun loyihasi koʻrib chiqildi va maʼqullandi.
Qonun bilan 14 yoshga toʻlmagan shaxsning nomusiga tekkanlik hamda unga nisbatan jinsiy ehtiyojni zoʻrlik ishlatib gʻayritabiiy usulda qondirganlik uchun uzoq muddatli 25 yilgacha yoki umrbod ozodlikdan mahrum qilish jazosi joriy etilmoqda. Shuningdek, bolalarning jinsiy daxlsizligiga qarshi sodir etilgan oʻta ogʻir jinoyatlar boʻyicha javobgarlikka tortish va hukmni ijro etish muddatlari oʻtib ketgani qoʻllanmaydi. Bolaning oʻlimiga sabab boʻlgan qasddan sodir etilgan jinoyatlar uchun shartli hukm qilish va jazodan muddatidan ilgari shartli ozod etish butunlay taqiqlanmoqda.
Qonun kuchga kirishi uchun prezident tomonidan imzolanishi kerak.
Oʻqish paytida maosh, diplomdan keyin ish: oliy taʼlimda yangi tizim
2027-2028 oʻquv yilidan oliy taʼlim muassasalarida korxonalar buyurtmasi asosida, bitiruvchini ishga qabul qilish sharti bilan dual taʼlim tizimi joriy etiladi. Korxona talabaga oʻqish davrida oylik toʻlaydi, talaba esa bitirgandan keyin shu korxonada kamida ikki yil ishlab berishi kerak boʻladi. Bu tartib prezident farmonida belgilandi.
Hujjatga koʻra, yuqori malakali kadrlarni tayyorlashda «korxona – oliygoh – maqsadli kadr» tamoyili joriy etiladi. Kadrlar ish beruvchi korxonalarning buyurtmalari asosida tayyorlanadi.
Dual taʼlim shakli boʻyicha qabul qilinadigan bakalavriat yoʻnalishlari va qabul parametrlarini oliy taʼlim muassasasining oʻzi belgilaydi. Bunda ular Oliy taʼlim, fan va innovatsiyalar vazirligi bilan kelishib olishi kerak. Qabul ish beruvchi korxonaning buyurtmasiga muvofiq, toʻlov-kontrakt asosida har yili 1-oktabrga qadar amalga oshiriladi.
Ijtimoiy himoya reyestridagi oilaga koʻmir uchun 600 ming soʻmgacha kompensatsiya beriladi
2026-2027 yillar kuz-qish mavsumida aholiga mahalliy koʻmir yetkazib berishning yangi tartibi joriy etilmoqda, deb xabar berdi «Oʻzbekkoʻmir» AJ.
Yangi mexanizmga koʻra, ijtimoiy himoya reyestriga kiritilgan oilaga xarid qilingan har bir tonna koʻmir uchun 300 ming soʻmdan, bir kalendar yilda jami 600 ming soʻmgacha kompensatsiya beriladi.
Shuningdek, aholiga mahalliy koʻmir yetkazib berish jarayoniga xususiy tadbirkorlar ham jalb qilinadi.
Aholi ehtiyojlari uchun 2026-yilda 1,53 mln tonna mahalliy koʻmir yetkazib berish rejalashtirilgan. Hozir koʻmirni hududlar kesimida taqsimlash va birja savdolariga chiqarish ishlari bosqichma-bosqich olib borilmoqda.
Ish joyida shahvoniy shilqimlikka qarshi qonun Senatda maʼqullandi
Mehnat kodeksini mehnat va mashgʻulotlar sohasida shahvoniy shilqimlikka yoʻl qoʻymaslikka oid yangi norma bilan toʻldirish koʻzda tutilgan qonun Senatda maʼqullandi.
2-oktabr kuni boʻlib oʻtgan yalpi majlisda koʻrib chiqilgan qonun bilan Mehnat kodeksiga «terisining rangi» hamda «siyosiy qarashlari» kabi belgilar mehnat va mashgʻulotlar sohasida kamsitish sifatida baholanadigan holatlar hisoblanishini nazarda tutuvchi oʻzgartirish va qoʻshimcha kiritilmoqda. Shuningdek, Mehnat kodeksi 8-1-modda bilan toʻldirilib, mehnat va mashgʻulotlar sohasida shahvoniy shilqimlikka yoʻl qoʻyilmaslik nazarda tutilmoqda.
Yangi normaga koʻra, shaxsga nisbatan uning uchun nomaqbul boʻlgan, shaʼni va qadr-qimmatini tahqirlaydigan, tashqi qiyofasi va qaddi-qomatini tavsiflashda, imo-ishora qilishda, teginishda yoki chaqirishda ifodalangan shahvoniy xususiyatga ega harakatlar shahvoniy shilqimlik sifatida baholanadi. Ish beruvchi mehnat jamoasida shahvoniy shilqimlikdan xoli muhitni yaratish uchun barcha zarur choralarni koʻrishi shartligi belgilanmoqda.
Talabaga maosh toʻlagan korxona xarajatining yarmini qaytarib oladi
Dual taʼlimda kadrlar tayyorlashga oid farmonda korxonalarning ushbu jarayonda faol ishtirokini qoʻllab-quvvatlash choralari belgilandi. Unga koʻra, korxonalarning har bir talabaga toʻlagan ish haqi xarajatlarining yarmi oʻquv yili yakunida subsidiya shaklida qoplab beriladi.
Mazkur tartib quyidagi taʼlim sohalarida dual shaklda tahsil olayotgan talabalar uchun amal qiladi: muhandislik ishi; ishlab chiqarish va ishlov berish; arxitektura va qurilish; qishloq xoʻjaligi.
Subsidiya talabaga berilmaydi. U korxonaning talabaga ish haqi toʻlash uchun qilgan xarajatlarining 50 foizini qoplashga yoʻnaltiriladi.
