Hozirda ANORBANK aksiyalarni joylashtirish va kapitalni amalda oshirish uchun qonunchilik hamda korporativ tartib-taomillarda belgilangan bosqichlardan oʻtmoqda.
2-oktabr kuni bank aksiyalarining 49,4 foiziga egalik qiluvchi Qahramonjon Olimov Kuzatuv kengashidan chiqish toʻgʻrisida ariza berdi. Ushbu masala 28-oktabr kuni aksiyadorlarning umumiy yigʻilishida koʻrib chiqiladi.
ANORBANK odatdagi tartibda faoliyat yuritmoqda: depozitlar, kreditlar va toʻlovlar boʻyicha operatsiyalar uzluksiz amalga oshirilmoqda. Markaziy bankning 2026-yil 1-sentabr holatidagi maʼlumotlariga koʻra, bank barcha prudensial normativlarga rioya qilmoqda:
• Yuqori likvidli aktivlar - 16,9%, belgilangan minimal talab - 10%.
• Likvidlikni qoplash koeffitsiyenti (LCR) - 116%.
• Sof barqaror moliyalashtirish koeffitsiyenti (NSFR) - 128%, belgilangan talab - 100%.
• Regulyativ kapital yetarliligi - 13%, belgilangan normativ - 12%.
Alohida aksiyador bilan bogʻliq holatlar bankning kundalik faoliyati va moliyaviy barqarorligini belgilamaydi.
Fitch reytingi - agentlikning oʻz metodologiyasi asosida berilgan tashqi bahosidir. ANORBANK uchun asosiy mezon regulyator talablariga rioya qilish boʻlib, bank ushbu talablarni toʻliq bajarmoqda. Qoʻshimcha aksiyalar chiqarilishi agentlik tomonidan koʻtarilgan asosiy masala - yangi kapital manbasi bilan bogʻliq savolni hal etishga qaratilgan.
Baholashlardagi farq nimada?
Fitch kapitalni oʻz metodologiyasi asosida hisoblaydi. Ushbu metodologiyada nomoddiy aktivlar, jumladan, sotib olingan dasturiy taʼminot ham hisobga olinmaydi. ANORBANK uchun esa bu sezilarli xarajat yoʻnalishlaridan biridir.
Bank faoliyatining dastlabki toʻrt yilida masofaviy xizmat koʻrsatish uchun oʻz tizimlariga sarmoya kiritdi. Ular qatoriga skoring, CRM, kredit konveyeri, kartalarni yetkazib berish va monitoring platformalari kiradi. Ushbu tizimlarning koʻpchiligi litsenziya asosida foydalanish uchun emas, balki mulk sifatida sotib olingan.
Shu sababli Fitch metodologiyasiga koʻra, 2025-yil yakunida tavakkalchilik darajasi boʻyicha hisoblangan aktivlarga nisbatan asosiy kapital koʻrsatkichi 0,9 foizni tashkil etgan. Kapitalni tiklash rejasi ushbu koʻrsatkichni 2026-yil oxirigacha 5 foizga yetkazishni nazarda tutadi. Qoʻshimcha aksiyalar chiqarilishi ushbu rejani amalga oshirish uchun zarur mablagʻlarni taʼminlashga qaratilgan.
