Özgargan alifbo va işsizlar uçun energotejamkor issiqxonalar - mahalliy dayjest

Qaşqadaryoda 6 mlrd dollarlik loyihalarga start berildi. Özbek-lotin alifbosida 4 ta harf rasman özgartirildi. Öquvçi, talaba va pedagoglar har yili psixologik diagnostikadan ötkaziladi. Tibbiy faoliyat bilan şuğullaniş uçun davlat röyxatidan ötiş majburiy böladi. Işsizlar uçun energotejamkor issiqxona majmualari barpo etiladi. Kunning muhim yangiliklari bilan taniştiramiz.

Özbekistondagi barça taʼlim taşkilotlari tarbiyalanuvçilari, öquvçi va talabalar hamda tarbiyaçi va pedagoglar har öquv yilida kamida bir marta psixologik diagnostikadan ötkaziladigan böldi.

Prezident qaroriga köra, diagnostika natijalari sunʼiy intellektda tahlil qilinib, öquvçi va pedagoglar uç guruhga ajratiladi, ruhiy qöllovga muhtoj deb topilganlarga mentor psixolog biriktiriladi.

Bunda uşbu tizim:

birinçi bosqiçda - 2026/27 öquv yilidan boşlab maktabgaça va umumiy örta taʼlim taşkilotlarida;

ikkinçi bosqiçda - 2027/28 öquv yilidan boşlab örta maxsus, kasbiy va oliy taʼlim taşkilotlarida joriy etiladi.

Tibbiy faoliyat bilan şuğullaniş uçun davlat röyxatidan ötiş majburiy böladi

Tibbiyot va farmatsevtika xodimlarini davlat röyxatidan ötkaziş tartibi töğrisidagi nizom tasdiqlandi.

Hukumat qaroriga köra, 2030-yil 1-yanvardan boşlab tibbiyot va farmatsevtika faoliyati bilan şuğullaniş huquqi faqat muayyan mutaxassislik böyiça davlat röyxatidan ötkazilgan şaxslarga 5 yil muddatga beriladi. Davlat röyxatidan ötmagan şaxsning tegişli mutaxassislik böyiça tibbiy yoki farmatsevtika kasbiy faoliyati bilan şuğullanişi taqiqlanadi.

2027-yil 1-iyuldan 2030-yil 1-yanvarga qadar xodimlar mutaxassisligi böyiça ixtiyoriy tartibda maxsus imtihon natijalariga köra yoki malaka toifalarini beriş jarayonida avtomatik ravişda davlat röyxatidan ötkaziladi.

Işsizlar uçun energotejamkor issiqxona majmualari barpo etiladi

Prezident Şavkat Mirziyoyev 20-oktabr kuni energotejamkor limonçilik issiqxonalarini taşkil etiş yuzasidan taqdimot bilan tanişdi.

Qayd qilinişiça, Andijon viloyati Baliqçi tumanidagi 100 gektar maydonda energotejamkor issiqxonalar qurib, ularni tayyor holda tadbirkorlarga taklif etiş rejalaştirilmoqda. Limon yetiştiriş, saralaş, qayta işlaş, qadoqlaş, saqlaş va sotiş işlari yagona kooperatsiya zanjiriga birlaştiriladi.

Loyihaga işsiz va kambağal oilalarni jalb etişga alohida eʼtibor qaratildi. Dastlabki hisob-kitoblarga köra, 500 ta issiqxonada mahalliy oilalardan kamida 1 ming nafar kişi iş bilan taʼminlanadi. Limon köçatlari hosilga kirguniga qadar oraliq ekinlar yetiştiriş orqali qöşimça daromad oliş mumkin böladi.

Baliqçi tajribasi asosida kelgusi yil hududlarda jami 200 gektar maydonda kambağal oila va işsizlar uçun energotejamkor issiqxona majmualarini barpo etiş rejalaştirilgan. Bu ikki mingta oilaning daromadini oşirişga xizmat qilişi kutilmoqda.