O‘zbekiston musulmonlari idorasi mamlakatda joriy yilda Ramazon hayiti 2023 yil 21 aprel, juma kuniga to‘g‘ri kelishi haqida qaror qabul qildi.
O‘zbekiston musulmonlari idorasida Ramazon oyi va hayitini aniqlash uchun tuzilgan Ishchi guruhi xorijdagi nufuzli astronomiya markazlari va O‘zbekiston Respublikasi Fanlar akademiyasi qoshidagi Astronomiya institutidan olgan ma’lumotlarga ko‘ra, 1444 hijriy yil Shavvol oyining yangi oy fazasi (hiloli) shu yil 20 aprel, payshanba kuni Toshkent vaqti bilan soat 09:12 da sodir bo‘lgan (tug‘ilgan).
O‘zbekiston musulmonlari idorasi Ulamolar Kengashi islom dini ta’limotlari va mazkur astronomik ma’lumotlarga asoslangan holda respublikada joriy yilda Ramazon hayiti 2023 yil 21 aprel juma kuniga to‘g‘ri kelishi haqida qaror qabul qildi.
Bugun xodimlar odatiy ish kunidan bir soat ertaroq ketishi mumkin. Mehnat kodeksi 121-moddasiga ko‘ra, bayram (ishlanmaydigan) kunlari arafasida kundalik ish (smena) muddati barcha xodimlar uchun kamida bir soatga qisqartiriladi.
Kun davomida prezidentning «Ramazon hayitini nishonlash to‘g‘risida»gi qarori e’lon qilinishi kutilmoqda. Unda dam olish kunlariga ham aniqlik kiritiladi.
Bu holda ikki variant bor:
- 2023 yilda rasmiy sanalarni nishonlash davrida qo‘shimcha ishlanmaydigan kunlarni belgilash va dam olish kunlarini ko‘chirish to‘g‘risidagi farmonda ko‘rsatilgan dushanbadagi dam olish kuni bekor qilinib, shanba kuni 6 kunliklar uchun qo‘shimcha dam olish deb e’lon qilinishi mumkin. Natijada juma, shanba va yakshanba — 3 kun dam olish kuni bo‘ladi;
- dushanbadagi dam olish kuni saqlangan holda shanba kunida 6 kunliklar uchun yana bitta qo‘shimcha dam olish kuni berilishi mumkin. Natijada juma, shanba, yakshanba va dushanba — 4 kun dam olish kuni bo‘ladi.
