Sog‘liqni saqlash vazirligi Surxondaryo viloyatidagi shifoxonada hamshira farzandi oldida vahshiylarcha kaltaklangani haqidagi videolavha yuzasidan ma’lumot berdi.
«Ma’lum bo‘lishicha, Denov tuman sil kasalliklar shifoxonasi bosh hamshirasi D.I. va mazkur davolash muassasasi fizioterapiya bo‘limi hamshirasi S.T.ning shaxsiy adovati sabab, joriy yil 18 oktyabr kuni ertalab soat 10:00 lar atrofida ziddiyatli holat yuzaga kelgan. Ushbu holatga S.T.ning yaqinlari ham aralashib, shifoxona bosh hamshirasiga tan jarohati yetkazgan.
Tibbiyot xodimlarining odob-axloq qoidalariga zid xatti-harakatlarni sodir etgan hamshiralar vaqtincha ishdan chetlashtirildi. Shu bilan birga kaltaklangan hamshira qizining ruhiy holati va sog‘lig‘i mutaxassislar nazoratiga olingan.
Ayni paytda huquq-tartibot idoralari tomonidan ushbu holat yuzasidan tegishli surishtiruv ishlari olib borilib, voqea sabablari aniqlanmoqda», deyiladi xabarda.
Qayd etish kerakki, bu O‘zbekistonda tibbiyot sohasi vakillariga oktyabr oyi davomida qilingan uchinchi hujum bo‘ldi. 12 oktyabr kuni Toshkent shahar Yakkasaroy tumanidagi xonadonlardan birida o‘z xizmat vazifasini o‘tayotgan «Tez yordam» xodimiga bemorning o‘g‘li tomonidan jarohat yetkazilgandi.
16 oktyabr kuni esa Toshkent shahar Mirobod tumanida chaqiruvga kelgan «Tez yordam» xodimi va 64 yoshli haydovchisi kaltaklangandi.
