Umidjon Salimov vazir o‘rinbosariga aylandi

O‘zbekiston Prezidenti Shavkat Mirziyoyevning farmoni bilan Umidjon Zokirjonovich Salimov Iqtisodiyot vazirligi o‘rnida qayta tashkil etilgan Iqtisodiyot va sanoat vaziri o‘rinbosari etib tayinlandi. Bu haqda Kun.uz manbasi xabar bermoqda.

Umidjon Salimov 2011-2013 yillarda «O‘zavtosanoat» AJ boshqaruv raisi o‘rinbosari bo‘lgan, 2013-2017 yillarda Oliy va o‘rta maxsus ta'lim vazirining birinchi o‘rinbosari bo‘lib ishlagan, 2017 yil aprelida «O‘zavtosanoat» AJga qaytgan va boshqaruv raisining texnika siyosati va mahalliylashtirish masalalari bo‘yicha o‘rinbosari sifatida ish boshlagan, o‘sha yilning avgustida «O‘zavtosanoat» AJ raisiga aylangan, ammo 2018 yilning iyunida lavozimdan olinib, shu kungacha «O‘zavtosanoat» AJ boshqaruv raisining rivojlantirish va marketing bo‘yicha o‘rinbosari sifatida faoliyatini davom ettirayotgandi.

O‘zbekiston prezidentning «Iqtisodiy rivojlanish sohasida davlat siyosatini amalga oshirish tizimini tubdan takomillashtirish chora-tadbirlari to‘g‘risida»gi farmoni bilan Iqtisodiyot vazirligi Iqtisodiyot va sanoat vazirligi etib qayta tashkil etildi.

Bundan oldinroq, Ravshan G‘ulomov Iqtisodiyot va sanoat vaziri  Botir Xo‘jayevga birinchi o‘rinbosar, Sohib Saifnazarov esa o‘rinbosar etib tayinlangani haqida xabarlar berilgandi.