Farg‘onadagi tezkor tadbirda 14 mln so‘mlik maishiy texnikalarning hujjati yo‘qligi aniqlandi

Farg‘ona viloyati bojxona boshqarmasi axborot xizmati tomonidan Kun.uzga berilgan ma'lumotlarga ko‘ra, boshqarmaning Kontrabandaga qarshi kurashish va bojxona auditi bo‘limi xodimlari tomonidan oldindan olingan tezkor ma'lumotlar asosida tezkor tadbir o‘tkazilgan. 

Tadbir davomida “Quvasoy-Marg‘ilon” yo‘nalishida harakatlanayotgan fuqaro A.J. boshqaruvidagi “Lada Vesta” rusumli avtomashina kuzatuvga olinib, Marg‘ilon shahri hududida to‘xtatilib xolislar ishtirokida ko‘zdan kechirilganda, mazkur avtomashina saloni va yukxonasida xorijda ishlab chiqarilgan va bojxona rasmiylashtiruvidan o‘tganligini tasdiqlovchi hujjatlarga ega bo‘lmagan, dastlabki qiymati 14 mln so‘mlik jami 20 dona 3 turdagi changyutgich maishiy texnika tovarlari borligi aniqlangan.

Ma'lum qilinishicha, hozirda mazkur holat yuzasidan surishtiruv harakatlari olib borilmoqda. 

Avvalroq, Farg‘onada 34 mln so‘mlik kimyoviy dori vositalari noqonuniy savdosining oldi olinganligi haqida xabar berilgan edi.