Toshkentda to‘rtta mashina ishtirokida YTH sodir bo‘ldi. Toyota Prado haydovchisi vafot etdi

Toshkent tumanida to‘rtta mashina ishtirokida yo‘l-transport hodisasi sodir bo‘lgan. Toshkent viloyati IIB YHXB axborot xizmatining xabar berishicha, hodisa bugun 2024 yil 24 may kuni soat 08:00 larda ro‘y bergan.

31 yoshli haydovchi Toyota Prado mashinasi bilan Toshkent tumani hududidan o‘tgan 4R-4 “Toshkent-Keles-Qozoqkensoy” avtomobil yo‘lida ketayotib boshqaruvni yo‘qotgan.

So‘ng qarama-qarshi yo‘nalishga chiqib ketgan va ro‘paradan kelayotgan Cobalt, Damas va Spark avtomobillari bilan to‘qnashuv sodir etgan.

Oqibatda, Toyota Prado haydovchisi voqea joyida vafot etgan. Qolgan haydovchilar tuman markaziy shifoxonasiga olib borilib, birinchi tibbiy yordam ko‘rsatilgan.