Farg‘onada ma’muriy qamoqqa olingan shaxs 2,5 kv/m’dan ham kichik kamerada saqlanayotganligi aniqlandi

Oliy Majlisning Inson huquqlari bo‘yicha vakili — Ombudsmanning Farg‘ona viloyatidagi mintaqaviy vakiliga fuqaro murojaat qilgan. Ma’lum bo‘lishicha, murojaatchi Farg‘ona viloyatdagi ma’muriy qamoqqa olingan shaxslarni qabul qilish va saqlash uchun mo‘ljallangan maxsus qabulxonada saqlanayotgan akasi X.B.ning sharoitlari yaxshi emasligini ta’kidlagan. Ombudsman mintaqaviy filiali bu masala hal qilinganini ta’kidladi.

“Murojaat nazoratga olinib, huquqbuzar X.B.ning saqlanish sharoitlari o‘rganildi. O‘rganish jarayonida u O‘zbekiston Respublikasining “Ma’muriy qamoqni o‘tash tartibi to‘g‘risida»gi Qonunining 20-moddasi talablariga zid ravishda belgilangan kamida 2,5 kv.m.dan kam bo‘lgan kamerada saqlanayotganligi aniqlandi”, — deyiladi Ombudsman axborotida.

Shu kunning o‘zida X.B. boshqa kameraga o‘tqazilib, murojaat muallifining talablari qanoatlantirilgan. Shuningdek, unga keltirilgan oziq-ovqat mahsulotlari ham yetkazilishi ta’minlangan.

Rasmiy bayonotda fuqaro nima uchun ma’muriy qamoqqa olingani haqida ma’lumot berilmagan.

“Ma’muriy qamoqni o‘tash tartibi to‘g‘risida»gi Qonunining 20-moddasiga ko‘ra, ma’muriy qamoqqa olingan shaxslarga sanitariya va gigiyena normalariga javob beradigan sharoitlar yaratilishi kerak. Shuningdek, kameralar yetarlicha tabiiy va sun’iy yorug‘likka ega bo‘lishi, unda bir kishiga to‘g‘ri keladigan maydonning normasi kamida 2,5 kvadrat metrni, ayollar uchun esa kamida 3 kvadrat metrni tashkil etishi lozim.