Oliy Majlis deputati OTMlarga qabuldagi imtiyozlarni qoraladi

2020/21 o‘quv yili uchun OTMlarga qabulda 8694ta imtiyozli grant kvotasi ajratildi. Imtiyozli kvotalar 7 xil toifadagi abituriyentlarga berilmoqda.

Oliy Majlis Qonunchilik palatasi deputati Maqsuda Vorisova alohida toifadagi abituriyentlarga imtiyozlar berilishini tanqid qilib chiqdi.

«Yurtimizda millionlab yosh yigit-qizlar ko‘nglida bir olam orzu bilan OTMga o‘qishga kirishni istaydi. Bu yil qanday yangilik bo‘lar ekan, qabul o‘rinlari ko‘payarmikan, degan savollarga javob topish ilinjida intizor bo‘ladi. Ularning aksariyati o‘qishga kira olmasa, kelajagi, taqdiri qanday davom etishini bilmay, chuqur xavotirga tushadi.

Kechagina OAV orqali oliy o‘quv yurtlariga qabul haqida batafsil axborot berildi. Har tugul qabul o‘rinlari o‘tgan yilgiga nisbatan oshgani ko‘plab yoshlarni quvontirdi. Lekin, menimcha, o‘qishga kirishda imtiyozlar berilishi to‘g‘risidagi yangiliklar chin dildan o‘qib, tayyorgarlik ko‘rib yurgan yoshlarimizni o‘ylantirib qo‘ydi, hatto qalbini og‘ritdi. Ularning o‘ylari, og‘riqlarini tushunishimiz kerak», – deb yozadi Maqsuda Vorisova Xalq demokratik partiyasi rasmiy saytidagi maqolasida.

Sobiq senator O‘zbekiston Konstitutsiyasida barcha fuqarolar teng huquqqa ega deya belgilanganiga e'tibor qaratgan.

«Demak, ota-onasi qayerda xizmat qilishi yoki fuqaroning ayrim yutuqlarga ega bo‘lishi Konstitutsiyada belgilangan me'yordan ustun qo‘yilishi mumkin emas», – deydi u.

Maqsuda Vorisova maktabni oltin medal bilan tamomlagan abituriyentga hech qanday imtiyoz yo‘qligi, lekin respublika fan olimpiadalari g‘oliblariga va Zulfiya nomidagi davlat mukofoti sohibalariga imtiyoz berilishini savol ostiga olgan.

«Agar shu tanlovda oliy ta'limga imtihonsiz kirish imtiyozi bekor qilinsa, tanlovda qatnashuvchi qizlar tarkibi qanday o‘zgarar ekan?» – deya Zulfiya nomidagi mukofotni nazarda tutib savol qo‘ygan Maqsuda Vorisova.

Deputat so‘zining davomida organ xodimlarining farzandlariga imtiyoz berilishiga ham qarshi ekanini bildiradi.

«Mudofaa va huquq-tartibot idoralari tizimidagi xodimlar farzandlari uchun belgilangan imtiyozni ham tushunish qiyin. Shundog‘am bu tizimlardagi xodimlar katta imtiyozlarga ega. Endi ularning hisobidan farzandlariga ham imtiyoz berilishi ijtimoiy adolat tamoyiliga qanchalik to‘g‘ri keladi?..

Aytaylik, oddiy dehqon yoki bog‘bonning o‘qishni dunyodagi hamma narsadan ko‘proq istaydigan qorako‘z farzandi kimlargadir imtiyoz berilgani uchungina «yiqilsa», jamiyat, siz bilan biz unga adolatsizlik qilgan bo‘lmaymizmi? Bunday farzandlarning qalbi sinmaydimi? Dili og‘rimaydimi?..»

XDP vakilining fikricha, harbiy xizmatni namunali o‘taganlik uchun tavsiya asosidagi imtiyozni ham faqat harbiy sohadagi ta'limni davom ettirishga tatbiq etish kerak. Chunki, deydi siyosatchi, ana shunday imtiyoz egalari hisobiga haqiqiy bilim va qobiliyatga ega, eng muhimi, o‘zi tanlagan soha bo‘yicha yillab tayyorgarlik ko‘rgan yigit-qizlar oliy ta'limda o‘qish baxtidan benasib bo‘lib qolmoqdalar.

«Fikrimcha, qayerda o‘rinsiz imtiyoz yaratilsa, o‘sha joyda korrupsiya, degan baloga keng eshik ochiladi.

Shuning uchun ham uzoq hayot yo‘lining boshida turgan farzandlarimizni korrupsiya og‘usi bilan sug‘ormaylik, boshqalarini esa adolatsizlik bilan hayotdan norozi qilmaylik», – deya maqolasini yakunlagan Qonunchilik palatasi deputati Maqsuda Vorisova.

Ma'lumot uchun, bu yil harbiy xizmatchilar va ichki ishlar organlari xodimlarining farzandlari uchun beriladigan tavsiyanomalar ijodiy va kasbiy yo‘nalish uchun ham amal qiladi. Ilgari bu tavsiyanomalar faqatgina test asosidagi kirish imtihonlari uchun amal qilardi.