Farg‘onada 200 tupdan ortiq daraxti bo‘lgan hudud qurilish firmasi tomonidan o‘rab olindi

Farg‘ona shahrining Al-Farg‘oniy ko‘chasida joylashgan bog‘dagi 218 tup manzarali daraxt xavf ostida. Yoshlar bog‘i hududidagi 1 gektardan ortiq maydon “Far Tip Grant Qurilish” MChJ tomonidan temir to‘siqlar bilan o‘rab olinmoqda. Katta ehtimol bilan hududda ko‘p qavatli uy qurilishi mumkin.

Atrofi o‘rab olingan maydonda avval ham bir nechta chinor daraxti tagidan, boshqa manzarali daraxtlar esa yuqori qismidan kesib tashlangani ma’lum bo‘ldi.

Farg‘ona viloyat Ekologiya, atrof-muhitni muhofaza qilish va iqlim o‘zgarishi boshqarmasi matbuot kotibi Gulnoza To‘xtasinovaning ma’lum qilishicha, o‘rab olingan maydonda 7 tup chinor daraxti, 31 tup gledichi, 16 tup akatsiya, 14 tup yapon saforasi, 80 tup archa, 2 tup aylanta, 1 tup tut va 67 tup kitob archa, jami 218 tup daraxt bor.

“Holat yuzasidan o‘rganish ishlari olib borilib, hududdagi daraxtlar xatlovga olindi. 6 yanvar kuni o‘rnatilayotgan temir to‘sinlarni olib tashlash bo‘yicha ogohlantirish xati berdik. Ammo ogohlantirishimizga qaramasdan o‘rab olish ishlari hamon davom etyapti. Bog‘ning asosan eng ko‘p daraxt bor qismi o‘rab olinmoqda. Hozir surishtiruv ishlari olib boryapmiz”, deydi Gulnoza To‘xtasinova.

Hudud atrofini o‘rash ishlarini nazorat qilayotgan fuqarolardan biri maydonda bino bunyod etilayotganidan xabari yo‘qligi, bu haqida ma’lumot bera olmasligini ta’kidladi.

Farg‘ona viloyati Qurilish va uy-joy kommunal xo‘jaligi boshqarmasi Farg‘ona shahar bo‘limining Kun.uz muxbiriga ma’lum qilishicha, atrofi o‘rab olingan maydondagi qurilish ishlari “Far Tip Grant Qurilish” MChJga tegishli. MChJ tomonidan o‘zboshimchalik bilan o‘rnatilgan temir ustunlar olib tashlangan.

Sarvar Ziyoyev,
Kun.uz

#Farg‘ona #daraxt