Rossiyada migratsiya qonunchiligini buzgani, pasportini yo‘qotgani yoki boshqa sabablarga ko‘ra vaqtinchalik markazlarda saqlanayotgan, O‘zbekiston tomonidan so‘ralgan hujjatlar o‘z vaqtida yetib kelmagani uchun bu yerda olti oylab qolib ketayotgan mehnat muhojirlari bilan bog‘liq masala yuzasidan O‘zbekiston Tashqi ishlar vazirining birinchi o‘rinbosari Ilhom Ne'matov o‘z fikrini bildirdi.
Ne'matov Kun.uz muxbiri bilan suhbatda bu masalaga yechim topilishini ta'kidladi.
«Albatta, bu masala ham yechimini topadi. Bu masala bilan uch yil oldin hech kim shug‘ullanmagan. Mana, uch yildan beri prezidentimiz o‘zlari bunga juda katta ahamiyat beryaptilar. Tashriflar davomida Rossiya bilan bitimlar imzolandi. Mana shu bitimlarga asosan biz Moskvaga o‘zimizning Mehnat vazirligidan 9 nafar vakilimizni yubordik. 6ta konsullik bo‘limini ochdik – Yekaterenburgda, Qozonda, Vladivostokda, Rostovda, Sankt-Peterburgda. Oldin bular yo‘q edi. Faqatgina elchixonaning bitta konsullik bo‘limi bor edi xolos va Novosibirskda bizning konsulligimiz bor edi.
Bularni ochishdan maqsad nima? Asosiy maqsad – pirovard natijada Rossiyada ishlayotgan fuqarolarimizning manfaatini himoya qilish. Shuning uchun ham biz albatta bu masalalarni yechamiz. Hozirgi kunda biz ularga juda katta ahamiyat beryapmiz, mana mehnat migrantlarining pensiya masalasini hal qilyapmiz. Hech qanday muammo bo‘lishi mumkin emas bu sohada», – deydi Ne'matov.
Ma'lumot uchun, Rossiya migratsiya qonunchiligini buzgan muhojirlar to sud qarori chiqqunga qadar vaqtincha saqlash markazlarida tutib turiladi. Aslida bu yerda 10 sutka ushlab turilishi kerak bo‘lgan migrantlar Rossiya sudlarida ish hajmining ko‘pligi, shuningdek, elchixonadan so‘ralgan fuqaroning shaxsini tasdiqlovchi hujjatlar va boshqa ma'lumotlar vaqtida yetib kelmasligi ortidan oylab, hatto yillab qolib ketayotgani haqida ma'lumotlar bor.
Vaqtincha saqlash markazlaridagi ahvol qoniqarli emasligi, muhojirlar lagerlari tobora ko‘payib borayotgani aytiladi.
Avvalroq Rossiyada ham mehnat migrantlari uchun Green card joriy etish mo‘ljallanayotgani, Rossiyada «qora ro‘yxat»ga tushgan 400 ming o‘zbekistonlikni ro‘yxatdan o‘chirish ustida ish olib borilayotgani, xorijdagi migrantlarga masofadan o‘qish va diplomga ega bo‘lish taklif etilishi mumkinligi xabar qilingandi.
