Toshkentda 1 iyuldan tibbiy sug‘urta tizimi mexanizmlari joriy etiladi 

O‘zbekistonda tibbiy sug‘urta tizimi sinov tariqasida joriy qilinmoqda. Birinchi bo‘lib amaliyot Toshkent shahrida, shuningdek, Navoiy viloyatida ham joriy qilinadi. Bu haqda sog‘liqni saqlash vaziri Amrillo Inoyatov xabar berdi. 

«Prezidentning Oliy Majlisga yo‘llagan murojaatida ta’kidlanganidek, 2023 yildan boshlab, Davlat tibbiy sug‘urta tizimini Toshkent shahrida joriy qilish uchun barcha imkoniyatlar mavjud. Biz o‘zimizga majburiyat olgan holda Navoiy viloyatida ham tibbiy sug‘urtani yo‘lga qo‘yamiz», dedi vazir. 

Inoyatov so‘zlariga ko‘ra, bir oy muddatda tibbiy sug‘urta tizimini joriy etish bo‘yicha qaror ishlab chiqiladi.  

Shuningdek, Toshkent shahridagi 72 ta poliklinika va 40 ta shifoxonani kompyuter jihozlari, zarur tibbiy uskunalar bilan ta’minlashga 30 mlrd so‘m yo‘naltiriladi. 

Toshkent shahrida 2023 yil 1 iyuldan tibbiy sug‘urta tizimi mexanizmlari joriy etiladi. 

Bunda tibbiyot muassasalari to‘liq raqamlashtiriladi. Shundan so‘ng, har bir bemor qachon, qayerda va qanday davolanishi haqida aniq ma’lumotga ega bo‘ladi.