Ангренга киришда юк машинаси 4 та енгил машинани уриб кетди, қурбонлар ва ярадорлар бор

Тошкент вилояти Ангрен шаҳрида юк машинаси ва бир нечта автомашина иштирокида йўл-транспорт ҳодисаси содир бўлди, дея хабар бермоқда вилоят ИИББ.

Ҳолат 26 апрел куни соат 23:10 атрофида А373 автомобил йўлининг 93-километрида содир бўлган. Howo юк машинаси ҳайдовчиси (1995 й.т) Р.Н. ҳаракат вақтида бошқарувини йўқотиб, шу йўналишдаги 4 та трансорт воситаси билан тўқнашган.

Оқибатда Сobalt автомашинасида бўлган 51 ёшли ҳайдовчи И.Х. ва 40 ёшли йўловчи З.Т. воқеа жойида вафот этган.

Қолган транспорт воситаларида бўлган 4 киши эса турли даражадаги тан жароҳатлари билан тиббиёт бирлашмасига олиб борилган.

Ҳозирда ҳолат юзасидан Тошкент вилояти ИИББ ҳузуридаги Тергов бошқармаси томонидан Жиноят кодексининг 266-моддаси 3-қисми «а» банди билан жиноят иши қўзғатилиб, Howo юк машинаси ҳайдовчиси процессуал тартибда ушланган.

Бу биринчиси эмас

2025 йил 7 сентябр куни ҳам Тошкент вилоятининг Ангрен шаҳрида, А-373 «Тошкент-Ўш» халқаро автомобил йўлининг 93-километрида  8 та автомобил иштирокида йўл-транспорт ҳодисаси содир бўлганди. Бунинг оқибатида 11 киши ҳалок бўлган ва 5 киши турли тан жароҳатлари билан шифохонага ётқизилганди.

Шунингдек, 2021 йил майида ҳам А-373 автомобил йўлининг тахминан шу қисмида яна бир фожиали йўл-транспорт ҳодисаси содир бўлганди. Ўшанда Наманган-Тошкент йўналиши бўйича ҳаракатланган MAN русумли тиркамали юк автомобили бошқарувини йўқотиб, еттита машинани уриб кетганди, тўқнашув натижасида енгил автомобиллардан бири ёниб кетганди.

ЙТҲ натижасида 7 киши воқеа жойида вафот этган, яна 14 киши турли даражада тан жароҳати олганди.