Испания марказидаги Толедо провинциясида иккита йўловчи поезд тўқнашди. Antena 3 телеканали Фавқулодда вазиятлар тўғрисида огоҳлантириш ва оқибатларни бартараф этиш хизматига таяниб, авария оқибатида 50 киши ҳалок бўлиб, яна 179 киши яралангани ҳақида хабар берган. Регион ҳукумати 30 киши ўлими ҳақидаги маълумотни расман тасдиқлаган. Испания соғлиқни сақлаш вазирлиги эса ҳодиса оқибатида ҳалок бўлган ва яраланганлар тўғрисида аниқ маълумотга эга эмаслигини билдирган.
Авария маҳаллий вақт билан 28 октябр куни соат эрталабки 9 атрофида рўй берган. Renfe компаниясининг (давлат темирйўл оператори) Мадрид – Севиля йўналишида ҳаракатланган AVE тезюрар поезди Iryo компаниясининг (хусусий темирйўл оператори) Урда шаҳри яқинида тўхтаб турган поездига ортдан келиб урилган.
Iryo поездида 147, унга ортдан урилган AVE поездида эса 397 нафар йўловчи бўлган.
Ижтимоий тармоқларда тарқалган кадрларда бир неча вагон йўлдан чиқиб кетгани ва ёнғин рўй берганини кўриш мумкин.
Авария туфайли Мадрид-Андалусия тезюрар линиясида поездлар ҳаракати тўхтатилган. Бир неча поездлар йўлга чиқиши кечиктирилган.
El Pais ва ABC манбаларига кўра, авария инсон хатоси сабаб рўй берган бўлиши мумкин. Тахминларга кўра, темирйўл сигнализацияси тизимидаги носозликни бартараф этиш билан шуғулланган давлат компанияси ходими AVE поездини олдинда Iryo поезди тўхтаб тургани ҳақида огоҳлантирмаган.
Жорий йил январ ойида ҳам Испания жанубидаги Кордова провинциясида йирик темирйўл аварияси рўй берганди. Ўшанда ҳам иккита тезюрар йўловчи поездлар – Iryo компаниясининг Малагадан Мадридга ҳаракатланган состави ҳамда Renfe компаниясининг Мадриддан Уэлвага йўл олган Alvia поезди тўқнашганди. Ўшанда 46 киши ҳалок бўлганди.
Кордовадаги поездлар тўқнашуви Испанияда 2013 йилдан буён темирйўлларда рўй берган энг йирик авария бўлганди. 13 йилда олдин Галисиядаги Сантияго-де-Компостела станциясида Alvia поезди релсдан чиқиб кетганди. Ҳодиса оқибатида 80 киши ҳалок бўлиб, яна 145 киши жароҳатланганди.
