Президент Шавкат Мирзиёев учинчи марта Францияга расмий сафар билан бораркан, бу галги давлат ташрифида Париж уни алоҳида тайёргарлик билан кутиб олди. Энди Франция Ўзбекистоннинг стратегик ҳамкори, президент Макрон ҳамкасбини давлатнинг энг олий мукофоти – Фахрий легион ордени билан мукофотлади. Мирзиёев шарафига расмий қабул маросими ҳам ўтказилди.
Франция президенти Эммануэл Макроннинг Ўзбекистон раҳбарини бу гал жуда илиқ қабул қилганини у ўз саҳифаларида эълон қилган ўзбек тилидаги постлар ҳам исботлайди. Президент Мирзиёев давлат ташрифи билан 11-13 март кунлари Францияда бўларкан, бу унинг умумий ҳисобда 3-расмий сафари, биринчи марта 2018 йилда, сўнгра 2022 йилда расмий ташриф билан давлат раҳбари француз республикасида бўлганди. Ўз навбатида Эммануэл Макрон ҳам 2023 йилда Ўзбекистонга келиб кетган.
Мирзиёевнинг давлат ташрифи – Франция президенти Макроннинг Украина урушидаги жиддий бурилиш фонида Европа ролини кучайтириш саъй-ҳаракатлари авж олган бир даврга тўғри келди. Биласиз, Макрон саноқли кунлар олдин Вашингтон, сўнгра Лондонга бориб, АҚШнинг Украина бўйича ўзгарган позицияси ортидан Европа энди ўз хавфсизлиги учун ўзи мустақил бош қотириши кераклигини гапирганди. Гапнинг очиғи, Европа Украина мисолида хавфсизлик бўйича кимгадир боғланиб қолиш тўғри эмаслигини англаб етди. Яна президент ташрифига қайтсак, президент Макрон Мирзиёевни Франциянинг энг олий мукофоти – фахрий легион ордени билан тақдирлади.
Бундан ташқари, Ўзбекистоннинг стратегик шериклари сони мана, яна биттага кўпайди, бу Франция Республикаси. стратегик шериклик оддий муносабатлардан сифат жиҳатидан ҳам фарқ қилади. Стратегик шериклик одатда мудофаа ёки хавфсизлик билан боғлиқ бўлиб, икки томонлама муносабатларда мудофаадан таълимгача, соғлиқни сақлашдан ривожланишгача, шунингдек, савдо, инвестиция ва банк иши каби иқтисодий муносабатларни тўлиқ қамраб олади.
Ташриф тадбирларига эътибор қаратсак, президентни аэропортда аввал бош вазир, ҳозирги таълим вазири бўлиб ишлаётган Элизабет Борн кутиб олган. Аввалги сафарлар сингари бугун асосий офиси Францияда бўлган халқаро ташкилотлар раҳбарлари билан мулоқот даставвал бўлиб ўтди. Хусусан, БМТнинг таълим, фан ва маданият масалалари бўйича ташкилоти ЮНEСКО бош директори Одри Азуле билан Мирзиёев учрашди. Шу йилнинг кузида ташкилотнинг бош тадбири Самарқандда ўтказилади. Азуле ва Мирзиёев шуни ҳам гаплашган.
Президентни расмий кутиб олиш маросимидан сўнг у Франция президенти қароргоҳи – Елизей саройига йўл олган.
Ўзбекистон президенти матбуот хизмати тарқатган хабарларга кўра, икки томон муносабатларини янада мустаҳкамлашни аввал юзма-юз, кейин делегациялар иштирокида муҳокама қилди. Айтилишича, ўтган йили ўзаро товар айирбошлаш 1 млрд долларга етди, қўшма корхоналар сони 4 баробарга кўпайди. Икки президент асосий музокаралардан сўнг Стратегик шериклик ўрнатиш тўғрисидаги қўшма декларацияга имзо чекди.
