Фарғонадаги хусусий клиникага бурун операцияси учун борган департамент ходими вафот этди

Фарғона шаҳрида жойлашган хусусий клиникага бурун операцияси учун кирган 33 ёшли Муҳаммаджон Ҳусаинов шифохонадан ўлик ҳолда чиқди. Бу ҳақда марҳумнинг турмуш ўртоғи Daryo.uz’га хабар берган.

Хонзодабегим Ҳусаинованинг маълумот беришича, турмуш ўртоғи Муҳаммаджон 10 апрел куни соат 18:00 да операцияга кирган ва 22:30 да унинг вафот этгани маълум бўлган.

“Операциядан олдин ёнбошидан иккита укол олди. Рентген қилишди, ҳаммаси яхши, соғломсиз дейишганди. Ўз оёғи билан операцияга кириб кетганди”, деган марҳумнинг турмуш ўртоғи.

Аёл ўша куни клиникага олиб борган фарзандларини уйига ташлаш учун кетганида унга клиникадан қўнғироқ қилиб, соат 20:00 да турмуш ўртоғини палатага олишмоқчилигини хабар беришган.

“Кечки пайт соат 20:20 ларда клиникага бордим. Борсам на шифокор бор, на ҳамширалар. Ҳамма ёқ тинч, кутиб турдик. Соат 22:00 дан кейин яна сўрадим. Жонлантириш бўлимини ёпиб, қулфлаб қўйишган экан. Эркакларни чақиринг, дейишди. Талаб қилиб, ичкарига кирсак, эрим ўлиб бўлган ва ўраб қўйишган экан”, деган Хонзодабегим Ҳусаинова.

Марҳумнинг яқинларига кўра, бемор вафот этгач, шифокорлар воқеа жойидан қочиб кетган.

“Баҳодир Қўчқоров деган шифокор операция қилганди. У вилоят шифохонасида ишлар экан. Биз аввалига давлат шифохонасига боргандик. Шифокор мен давлат шифохонасида операция қилмайман дегани учун кейин хусусийга бордик. Эрим ўлиб қолганидан сўнг шифокор клиниканинг ертўласига яширинган экан. Мен ва қайнотам уларни излаб тополмай қолдик. Шифохонадаги лифтларни ҳам ўчириб қўйишганди”, дея маълум қилган марҳумнинг турмуш ўртоғи.

Шифокор Баҳодир Қўчқоров операциядан сўнг қочиб кетганини инкор қилган. Шунингдек, у беморни вилоят Болалар кўп тармоқли марказий шифохонасида фақатгина 18 ёшгача бўлган беморларга хизмат кўрсатилиши сабабли давлат шифохонасида операция қилмаганини айтган.

“Бемордаги бурун тўсиғи қийшиғини тўғирлаш операцияси кўнгилдагидек ўтганди. Мен шундан сўнг беморни анестезиолог ихтиёрига топшириб, у ердан кетганман. Қочиб кетмаганман. Ўлим ҳолати мен операцияни тугатиб, чиқиб кетганимдан сўнг тахминан 15-20 дақиқадан кейин содир бўлган. Жарроҳлик амалиёти ҳеч қандай муаммосиз ўтди, қон ҳам кетмади”, деган шифокор.

Шунингдек, Баҳодир Қўчқоров 15 дақиқага мўлжалланган амалиёт бир соатга чўзилиши ёки бир соатга мўлжал қилинган операция 15 дақиқада тугаши ҳам мумкинлигини билдирган.

Маълум бўлишича, вилоят шифохонасининг “Лор” бўлими мудири бўлган Баҳодир Қўчқоров “Доктор-А” хусусий клиникасида икки-уч ойдан бери фаолият юритмоқда. Клиника фаолият бошлаганига ҳам тахминан шунча вақт бўлган.

“Йилига шунақа операциялардан 500 тасини ўтказаман. Ўн йилдан бери шунақа операцияларни қиламан. Шунча вақт давомида тахминан беш-олти минг айнан шундай операцияларни бажарганман. Мен ўз ишимни тўлиқ ва хатосиз бажардим. Операция якунлангач, беморни анестезиологга топширганман”, дея таъкидлаган шифокор.

Бош прокуратура ахборот хизмати 2025 йилнинг 10 апрел куни операция натижасида вафот этган бемор Бош прокуратура ҳузуридаги Иқтисодий жиноятларга қарши курашиш департаментининг вилоят бошқармаси ходими эканини тасдиқлаган. Шунингдек, ҳолат юзасидан айни кунда Фарғона вилояти прокуратураси томонидан терговга кадар текшириш ҳаракатлари олиб борилаётгани, текшириш натижаси бўйича қонуний қарор қабул қилиниши билдирилган.

Аввалроқ Бухоро шаҳридаги хусусий клиникада 11 ёшли бола уколдан сўнг вафот этганди.