Энг оғир юк машиналари ва юридик шахсларга тегишли таксилар учун янги авторақамлар жорий этилади

“Йўл ҳаракати хавфсизлигини таъминлаш соҳасини рақамлаштириш бўйича қўшимча чора-тадбирлар тўғрисида”ги ҳукумат қарори қабул қилинди (11-сон, 20.01.2026 й.).

Қарорга мувофиқ, Жамоат хавфсизлиги департаменти Йўл ҳаракати хавфсизлиги хизмати ахборот тизимидаги Ma'muriy amaliyot модули масъул вазирлик ва идораларнинг ахборот тизимларига интеграция қилинади.

2026 йил 1 февралдан бошлаб қуйидаги янгиликлар жорий этилади:

• умумий вазни (юки билан) 44 тоннадан ортиқ юк автомобиллари, кон, шахта ва карерларда қўлланадиган махсус транспортлар, юридик шахсларга тегишли йўналишсиз таксилар, шунингдек, “антиквар” автомототранспортлар учун алоҳида серияли давлат рақам белгилари жорий этилади;
• ишлаб чиқарилганига 50 йил ва ундан ортиқ бўлган транспорт воситаларидан фойдаланиш ва уларни қайта рўйхатга олиш тақиқланади, бундай транспортлар давлат рўйхатидан чиқарилади.

Шу билан бирга, автомототранспорт рўйхатдан ўтказилганлиги тўғрисидаги гувоҳномада мулкдорнинг манзилини кўрсатиш талаби бекор қилинади.

Автомототранспортни давлат рўйхатидан ўтказиш жараёнида қатор ҳужжатлар ваколатли органлардан идоралараро электрон ҳамкорлик орқали олинади. Жумладан:

• автомототранспорт олди-сотди шартномаси;
• “Электрон онлайн аукционларни ташкил этиш” АЖ томонидан берилган аукцион баённомалари;
• давлат улуши мавжуд корхоналар томонидан ишлаб чиқарилган транспортларга оид электрон ҳисоб-маълумотлар;
• автомототранспорт мулкдори ҳақидаги маълумотлар.

Қарор йўл ҳаракати хавфсизлиги соҳасида шаффофликни ошириш, бюрократик тўсиқларни қисқартириш ва хизматлар сифатини яхшилашга қаратилган.