Биржада АИ-80 бензини сотуви тўхтатилди

2025 йилги давлат дастурида белгиланган АИ-80 бензинидан воз кечиш вазифасига мувофиқ, “Ўзбекнефтгаз” 2 сентябрдан эътиборан бу маркали бензинни биржа савдоларига чиқаришни тўхтатди. Компания унинг ўрнига АИ-92 таклифи оширилганини билдирди.

Очиқ манбалардан олинган сурат

“Ўзбекнефтгаз” бугундан бошлаб АИ-80 бензинини биржа савдолари орқали сотишни тўхтатди.

Компания матбуот хизмати хабарига кўра, бу – 2025 йилги давлат дастурига оид президент фармони ижроси билан боғлиқ. Шунга кўра, 2 сентябрдан бошлаб, Аи-80 бензини биржага чиқарилмайди.

“Ўз навбатида, АИ-92 русумидаги автобензиннинг биржа савдоларига чиқариш ҳажмлари оширилди. Шу вақтга қадар 1000 тонна АИ-92 бензини савдоларга қўйилган бўлса, бугунги кунда бу рақам 1720 тоннани ташкил этмоқда. Ички бозор талабидан келиб чиқиб, бу ҳажмларни ошириш имконияти мавжуд”, – дейилади “Ўзбекнефтгаз” баёнотида.

Қайд этилишича, август ойида тадбиркорлар томонидан харид қилинган АИ-80 русумидаги автобензин ҳажмлари мажбурият ва мавжуд қолдиқлар доирасида сентябр ойида ҳам ўз эгаларига етказиб берилади.

Аввалроқ Kun.uz сўнгги бир неча ҳафта ичида АЁҚШларда АИ-80 ва АИ-92 бензини нархлари ошгани ҳақида хабар берганди.

АИ-80 нархи, ундан воз кечиш ва присадкали АИ-92 — Рақобат қўмитаси изоҳлари

Тайёрлаган: Комрон Чегабоев

#бензин #Ўзбекнефтгаз #энергетика