Трамп Минобдаги қизлар мактабига зарбада Теҳронни айблади

АҚШ президенти Доналд Трамп Air Force One самолёти бортида журналистларнинг саволларига жавобан Минобдаги қизлар мактабига йўлланган зарба учун Эрон жавобгар эканини айтди.

Бу айбловни унинг ёнида бўлган мудофаа вазири Пит Ҳегсет ҳам тасдиқлаган.

«Мен кўрган маълумотларга кўра, бу ишни эронликлар қилган», – деган Трамп.

Шундан кейин журналист Пентагон раҳбари Пит Ҳегсетга ҳам шу савол билан мурожаат қилган. У эса шундай жавоб қайтарган: «Биз, албатта, текширув олиб боряпмиз, аммо тинч аҳолини нишонга оладиган ягона томон бу – Эрон».

Трамп эса шундай қўшимча қилган: «Бизнингча, буни эронликлар қилган... Биласизки, уларнинг ўқ-дорилари жуда ноаниқ. Уларда аниқлик умуман йўқ. Буни Эрон қилган». У ўз сўзларига ҳеч қандай далил келтирмаган.

Эрон жанубида жойлашган Миноб шаҳридаги қизлар мактаби Яқин Шарқдаги урушнинг илк кунида – 28 феврал куни ҳужумга учради. CNN маълумотига кўра, зарба оқибатида 180 киши ҳалок бўлган.

Эрондаги давлат нашрларига кўра, Теҳрон Минобга зарбада Вашингтонни айблаган. Америкадаги нашрлар, жумладан The New York Times, Reuters ва CNN ҳам АҚШ ҳарбийлари ушбу зарбага алоқадор бўлиши мумкинлигини хабар қилган. 

Хусусан, The New York Times АҚШ ҳарбий-ҳаво кучларининг нишони Минобдаги Ислом инқилоби муҳофизлари корпуси базаси бўлгани ва мактабга хатолик билан зарба берилган бўлиши мумкинлиги ҳақида ёзган.

NBС News манбаларига кўра, Доналд Трамп маъмурияти конгрессга америкалик ҳарбийлар Минобдаги мактаб жойлашган ҳудудга зарба берганини тасдиқлаган.

АҚШ мудофаа вазирлиги мактабга зарба берилгани ҳақидаги хабарлардан сўнг текширув ўтказаётганини маълум қилиш билан чекланган.