Германия канцлери ташрифи доирасида 10 га яқин ҳужжат имзоланди

Ўзбекистон ва Германия ўртасидаги ўзаро манфаатли ҳамкорликни янада кенгайтиришга қаратилган икки томонлама ҳужжатлар имзоланди.

Фото: Президент матбуот хизмати

Самарқанд шаҳрида ўтган самарали музокаралар якунида Ўзбекистон президенти Шавкат Мирзиёев ва Германия федератив республикаси федерал канцлери Олаф Шолц қўшма декларацияни қабул қилди.

Умуман, расмий ташриф доирасида 8 та икки томонлама ҳужжат имзоланди, шу жумладан:

- Миграция ва мобиллик соҳасида ҳар томонлама шериклик тўғрисида ҳукуматлараро битим;

- Ветеринария ва чорвачилик соҳасида ҳамкорлик тўғрисида ҳукуматлараро декларация;

- "Яшил Марказий Осиё" ташаббуси доирасида сув ресурсларидан барқарор фойдаланиш соҳасидаги ҳамкорлик тўғрисида ҳукуматлараро декларация;

- Ўта муҳим минераллар соҳасидаги ҳамкорлик тўғрисида қўшма декларация;

- Транспорт соҳасидаги ҳамкорлик тўғрисида битим;

- Париж битими доирасида иқлим ўзгариши соҳасидаги ҳамкорлик тўғрисида меморандум.

Бундан ташқари, 2024-2026 йилларга мўлжалланган Технологик шериклик ва саноат кооперацияси дастури қабул қилинди, шунингдек, Ўзбекистон ва Германиянинг етакчи корхоналари даражасида бир қатор битим ва шартномалар тузилди.