Эълон қилинган ойлик прогнозга кўра, 2026 йил ноябрда ўртача ҳаво ҳарорати иқлим меъёри атрофида, баъзи жойларда эса ундан 1–1,5 даража юқори бўлади.
Биринчи ўн кунликда ҳаво илиқ бўлади
Ойнинг дастлабки ўн кунлигида ҳарорат асосан:
кечалари 5–10 даража илиқ;
кундузлари 17–22 даража илиқ бўлиши кутилмоқда.
Иккинчи ва учинчи ўн кунликларда ҳарорат фони пасаяди. Кечалари ҳарорат 3–8 даража илиқдан 2 даража совуқ — 3 даража илиққача, кундузлари эса 15–20 даража илиқдан 5–10 даража илиққача ўзгариб туради.
Қор ёғиши ҳам истисно этилмаяпти
Ноябрнинг айрим кунларида асосан ёмғир кўринишида ёғингарчилик бўлиши мумкин. Ҳаво совиган даврларда ёмғирнинг қисқа муддатга қорга айланиши ҳам истисно қилинмаган.
Ойлик ёғингарчилик миқдори меъёр атрофида, баъзи жойларда эса меъёрдан кам бўлиши прогноз қилинмоқда.
Ноябр одатда қандай ўтади?
Кўп йиллик иқлим маълумотларига кўра, ноябрда ўртача ҳаво ҳарорати октябрга нисбатан 6–7 даража, шимол ва чўл ҳудудларида эса 8–9 даража паст бўлади. Шимолдан ва шимоли-ғарбдан совуқ ҳаво кириб келиши кучайиб, илиқ даврлар кескин совишлар билан алмашиши мумкин.
Кузатувлар тарихида 2023 йил ноябри Ўзбекистондаги энг илиқ ноябр бўлган. Ўшанда ўртача ойлик ҳарорат иқлим меъёридан 3–6 даража юқори қайд этилган.
2011 йил ноябри эса мамлакатнинг катта қисмида рекорд даражада серёғин келган. Масалан, Тошкентда ойлик меъёр 51 миллиметр бўлгани ҳолда, 167 миллиметр ёғингарчилик кузатилган.
Бу тарихий кўрсаткичлар ноябр об-ҳавосининг ўзгарувчанлигини акс эттиради; жорий йил учун прогнозда эса ҳароратнинг меъёр атрофида ёки бироз юқори бўлиши кутилмоқда.
