АҚШ давлат котиби Рекс Тиллерсон Форс кўрфази мамлакатларининг Қатар билан дипломатик муносабатларини узгани тўғрисидаги хабарлардан сўнг шу хусусда баёнот берди. У минтақа давлатларини бирдамликка чақирди, деб хабар қилмоқда Франс Пресс агентлиги.
Душанба, 5 июнь куни Саудия Арабистони, Миср, Баҳрайн ва БАА Қатар билан дипломатик ва консуллик муносабатларини узганлигини эълон қилди. Улар расмий Дохани террорчилик ташкилотларини қўллаб-қувватлаш ҳамда ушбу араб давлатларидаги ички вазиятни беқарорлаштириш бўйича ҳаракатларни олиб бораётганликда айблади.
"Биз, албатта, томонларни музокаралар даврасига ўтириш ва тушунмовчиликларга барҳам беришга чақирамиз", — дея Сиднейда шундай баёнот берган Тиллерсон сўзларини келтиради агентлик.
"Агар муаммоларни бартараф этиш борасида бирор ёрдам бера олсак, унда биз Форс кўрфази араб давлатлари ҳамкорлиги кенгаши ягона бўлиб қолишини хоҳлаймиз", — деб қайд этган Тиллерсон.
