АҚШнинг БМТдаги доимий вакили: КХДР билан мулоқот қилиш вақти тугади

АҚШнинг БМТдаги доимий вакили Никки Ҳейлининг баёнот беришича, у бирор натижага эришилмас экан, БМТ Хавфсизлик кенгашининг Шимолий Корея бўйича навбатдаги мажлисини чақиришдан маъни кўрмаяпти. Дипломат ўзининг Twitter саҳифасида шундай баёнот берди. 

«Мулоқот қилиш вақти ўтди. Эндиликда, Шимолий Корея тузумининг халқаро тинчликка раҳна солаётгани ҳаммага маълум», — деган Ҳейли. 

Унинг сўзларига кўра, ХКнинг КХДР ҳаракатларини қораловчи яна битта резолюцияси «Шимолий Кореяга халқаро босимни кучайтирмайди».

«Аслида, бу ҳеч нарса қабул қилинмаганидан ҳам ёмонроқдир. Чунки, янги резолюция Шимолий Корея диктаторига халқаро ҳамжамият у билан жиддий курашмоқчи эмаслиги ҳақида ишора беради», — дея таъкидлаган Америка доимий вакили.