Европарламент Шенгенда хорижликларни назорат қилиш бўйича янги тизимни тасдиқлади

Европарламент чоршанба куни Страсбургдаги ялпи сессияда Евроиттифоқда Шенген ҳудуди чегараларида учинчи давлатлар фуқароларининг кириш-чиқишини, шунингдек, улар томонидан Шенгенга киришда берилган рад жавобларини автоматик тарзда қайд этиш тизимини қўллаш ҳақидаги директива лойиҳасини маъқуллади. 

Еврокомиссия қонунчилик ташаббусини 477 депутат маъқуллаган бўлса, 139 депутат қарши овоз берган. 

«Кириш-чиқиш» тизимига кўра, учинчи давлат фуқароси ўзининг хорижга чиқиш паспортини сканердан ўтказади. Айни дамда Шенген ҳудудига кираётган ва ундан чиқаётган хорижликлар паспортига чегарани кесиб ўтиш чоғида муҳр қўйилади. Шу билан бирга, муҳрнинг сохталаштирилиши ҳам учраб туради.

ЕИ Кенгашидан аниқлик киритишларича, янги тизим Шенгенга визалар орқали кирувчи хорижликларга ҳам, ЕИ билан қисқа муддатли ташрифлар учун визасиз режимга эга давлатлар фуқароларига ҳам тегишли бўлади.

Янги тизимда йўловчилар ҳақидаги биометрик маълумотлар, улар томонидан сафар ҳужжатларининг фойдаланиши бўйича ахборот сақланади. Бу маълумотларнинг сақланиш муддати уч йил билан чекланган, Шенгенда бўлиш муддатини ўтказиб юборган хорижликлар учун эса – беш йилни ташкил қилади.

ЕИдан тахмин қилишларича, янги лойиҳа нафақат ички хавфсизлик ва терроризм билан курашни мустаҳкамлайди, балки чегара назоратидан ўтиш вақтини қисқартиради ҳамда Шенген ҳудудида бўлишга рухсатномаси муддатини ўтказиб юборган хорижликларни аниқлашда ҳам қўл келади.