Трамп Ойга парвозларни қайта бошлашга кўрсатма берди

АҚШ президенти Дональд Трамп 11 декабрда Барак Обама томондан тугатилган Ой дастурини қайта бошлаш ҳақидаги кўрсатмани имзолади. 

 “Мен бугун имзолаётган директива АҚШнинг Ой дастури йўналишини ўзгартиради, америкалик фазогирларни узоқ муддатли тадқиқотлар учун 1972 йилдан илк бор Ойга қайтаришдаги муҳим қадамни англатади”, деб айтган Трамп ҳужжатнинг имзоланиши маросимида.  

“Бу гал биз у ерда нафақат байроғимиз ва изларимизни қолдирамиз, балки Марсга ва эҳтимол, қолган бошқа дунёларга парвозлар учун асос яратамиз”, деб айтган Трамп. Маросимда НАСАнинг амалдаги ва собиқ фазогирлари ҳамда АҚШ маъмурияти аъзолари иштирок этганлар.

Президентнинг айтишича, бу қарор АҚШнинг коинотда етакчилик қилиши ва қўшимча иш ўринларини таъминлаши учун “улкан қадам” ҳисобланади.

Трамп ҳужжатни имзолаётиб, “коинот кўплаб, жумладан ҳарбий соҳадаги татбиқларга эгалигини” айтган, бироқ тафсилотларга берилмаган.

Трампнинг “Биринчи коинот директиваси”ни имзолаши 1972 йилда АҚШ экипажининг Ойга “Аполлон-17” кемасида охирги парвозининг 45 йиллигига тўғри келди.

АҚШнинг собиқ президенти Барак Обама ташаббуси билан ундан аввалги президент Кичик Жорж Буш маъмурияти томондан таклиф қилинган “Юлдузлар туркуми” дастури тугатилган. Бу дастур Ойга парвозлар ва кейинроқ Марсга учиш истиқболи билан унда доимий база яратиш режаларини ўз ичига олган. Обама вақтида 2030-йилларда Марсга инсонларнинг парвоз қилишига устувор вазифа сифатида қаралган.