Хитойлик тадбиркор Daimler’нинг энг йирик акциядорига айланди

Хитойнинг Geely компанияси раҳбари Ли Шуфу Mercedes Benz машиналарини ишлаб чиқарувчи Daimler автомобилсозлик концернининг 9,69 фоиз акциясини ўзида жамлай олди. 

Хитойлик сотиб олган акцияларнинг нархи 9 млрд долларни ташкил қилади. Тадбиркор ўз қарорини  немис концерни билан электромобиллар ва ҳайдовчисиз машиналар яратиш соҳасида альянс ташкил этиш истаги билан тушунтирган.

Маълум қилинишича, Geely эгаси Daimler компанияси Tesla, Google ва Uber олиб бораётган технологик пойгада “омон қолиши”га умид қилмоқда. Бундан ташқари, Ли Шуфу Хитойда қўллаш учун Daimler’нинг экологик соф автомобилларни яратиш соҳасидаги ишланмаларини қўлга киритмоқчи. 

Daimler’да хитойликнинг акцияларни сотиб олгани ижобий қабул қилинган ва инновацияларга қизиқиш билдирувчи ва концернга олға боришда ёрдам бериши мумкин бўлган янги сармоячи илиқ қарши олинган. 

Аввалроқ ҳам Zhejiang Geely компанияси  йирик автомобилсозлик компанияларига пул тиккан. Жумладан, компания Малайзиянинг Proton компаниясининг 49 фоизини ҳамда Volvo Trucks’дан 3,3 млрд долларлик акция сотиб олган.

Thomson Reuters маълумотларига кўра, Ли Daimler’нинг энг йирик акциядорига айланди. Унинг улуши Кувайт инвестицион фондиникидан ҳам кўпроқни ташкил қилмоқда. Фондга 2017 йил сентябрда Daimler’нинг 6,8 фоиз акцияси тегишли бўлган. Компаниянинг 69 фоиз акцияси юридик ва хусусий сармоячилар орасида тақсимланган.