Mercedes-Benz компанияси марка модель қаторидаги энг узун машина - Mercedes-Maybach Pullman’нинг янгиланган версиясини тақдим этди. Модель Mercedes-Maybach S-Class седани каби радиаторга ҳамда интерьернинг янги ранг комбинацияларига эга бўлди.
Тик тахтачага ўхшаш радиатор панжараси классик костюмни эслатиб юборади. Ишлаб чиқарувчи буни биринчи марта Vision Mercedes-Maybach 6 концепт-карида қўллаган. Шунингдек топ вариантдаги «Майбах» 20 дюймлик ғилдирак дисклари ва икки рангли опционал кузов билан ажралиб туради.
6,5 метр келувчи лимузин ичини безаш учун учта янги ранг тақдим этилган: кул ранг, жигарранг ва кўк аралаш қизғиш.
Салоннинг орқа қисмида тўрт нафарга яқин йўловчи жойлашиши мумкин. Лимузинда машина олд камерасига уланиши мумкин бўлган дисплей ва аудиотизим функцияси ҳам бор, у биринчи ҳамда иккинчи қатордаги йўловчиларга турли мусиқани тинглаш имконини беради.
Mercedes-Maybach Pullman капоти остида 630 от кучига эга олти литрлик V12 двигатели жойлашган. Лимузин «юзга» 6,5 сонияда чиқиши мумкин.
