Брежнев Ўзбекистонга келганида ҳаракатланган «Чайка» сотувга қўйилди

«Юла» эълонлар сайтида 1980 йилда ишлаб чиқарилган ГАЗ-13 «Чайка» сотилаётгани ҳақида хабар пайдо бўлди. Машинани сотаётган шахснинг иддао этишича, лимузин элчихона гаражига кирган, 1982 йилда эса КПСС МҚ бош котиби Леонид Брежнев Ўзбекистонга ташрифи вақтида унда ҳаракатланган. Нархи – 30 млн рубль.

«Чайка» ҳозирга қадар икки кишига тегишли бўлган ва икки минг километр йўл босган. Асл двигатель ҳам сақланиб қолди – V шаклли 5,53 литрлик, 195 от кучига эга «саккизталик». У уч поғонали гидромеханик узатмалар қутиси билан уйғунлашган. Лимузин «юзга» 20 сонияда чиқиши мумкин, унинг максимал тезлиги эса соатига 160 километрни ташкил этади.

«Чайка»нинг жиҳозланиши машина мақомига мос ва ўша даврдаги маҳаллий машиналарга ўхшамайди. Хусусан, лимузин электр ойна кўтаргичлар, иситиш тизими, туманга қарши фаралар, қорайтирилган ойналар ва чармли ўриндиқларга эга.