Президент Шавкат Мирзиёев ташаббуси ва бевосита топшириғи асосида мамлакатда илк бор дунё тиббиётида энг мураккаб ва нозик амалиёт ҳисобланган органлар трансплантацияси бўйича замонавий операциялар амалга ошира бошланди, деб хабар бермоқда Соғлиқни сақлаш вазирлиги ахборот хизмати.
Ўтган йилдан эътиборан академик В.Воҳидов номидаги Республика ихтисослаштирилган хирургия илмий-амалий тиббиёт марказида буйрак кўчириб ўтказиш бўйича операциялар муваффақиятли бажариб келинаётган бўлса, жорий йилдан ушбу марказда мамлакатимиз тиббиёти тарихида биринчи марта жигарни кўчириб ўтказиш операцияси юқори натижа билан ўтказилди.
Академик В.Воҳидов номидаги Республика ихтисослаштирилган хирургия илмий-амалий тиббиёт марказида буйрак кўчириб ўтказиш операциялари кундалик амалиётлар қаторидан жой олган. Ўтган қисқа вақт ичида қирқ нафардан ортиқ беморга унинг яқинларидан буйрак кўчириб ўтказилди. Бундан ташқари, марказ олимлари томонидан саломатлик билан боғлиқ ўта мураккаб вазиятларда ҳам тўғри қарор қабул қилиниб, инсон ҳаёти сақлаб қолинаётгани қувонарли. Яқинда буйрак етишмовчилиги билан бирга, қандли диабет хасталигидан ҳам азият чекаётган беморда худди шундай амалиёт бажарилди. Ушбу жараён шифокорлардан ниҳоятда катта масъулият ва тажриба талаб қилиши билан ажралиб турди.
Шундай мураккаб амалиётлардан бири Республика Гематология ва қон қуйиш илмий текшириш институтида ҳам ўтказиб келинмоқда. Институт олимлари жаҳон тиббиётининг илғор йўналиши — ўзак ҳужайра трансплантациясини ўзлаштириб, ҳозирда уни муваффақиятли йўлга қўйди.
Бугун Республика шошилинч тиббий ёрдам илмий марказида Туркиянинг Башкент тиббиёт университети билан ҳамкорликда янгийўллик 14 ёшли бемор Умиджон Абдумаджидовга 35 ёшли отаси Илгор Абдуқаюмов донорлигида буйрак кўчириб ўтказиш операцияси бажарилди.
— Трансплантация жарроҳлиги замонавий тиббиётнинг истиқболли йўналишларидан бири. Бундай юқори технологик операциялар АҚШ, Россия, Германия, Норвегия, Швейцария, Туркия каби тиббиёти ривожланган давлатлардагина бажариларди, холос, — дейди Соғлиқни сақлаш вазири ўринбосари, Республика шошилинч тиббий ёрдам илмий маркази бош директори Абдуҳаким Хаджибаев. — Мана, бугун юртимиз тиббиёти ҳам ана шу илғор мамлакатлар қаторидан жой олди. Марказимизда биринчи марта буйрак кўчириб ўтказиш амалиётини бажардик. Бу операция ўта мураккаб ва ноёб усул ҳисобланади. Шу боис марказда катта тайёргарлик кўрилди. Хориж тажрибасини ўргандик. Шундан сўнг, Туркиянинг Башкент тиббиёт университети билан ҳамкорликда марказимиз тарихида илк бор буйрак трансплантацияси бажарилди. Амалиёт Башкент тиббиёт университети ректори, Жаҳон трансплантологлари жамияти президенти Мехмет Хаберал билан ҳамкорликда ўтказилди. Операция жараёнида туркиялик ва ўзбекистонлик мутахассислар ўз маҳоратларини кўрсатишди.
