Шомуродов, Галиулин ва Ҳамдамов учун омадсиз тур. Россия чемпионатида пойга давом этмоқда

Россия чемпионатининг 25-тури доирасида бугун яна 3 учрашув ўтказилди.

Аввалига «Тосно» клуби «Урал»га қарши ўйинда ғалабани қўлдан чиқарди. Санкт-Петербургдаги «Петровский» стадионида кечган учрашув 2:2 ҳисобида якунланди.

Ўйиннинг 6-дақиқасида мезбонларнинг ўзбекистонлик легионери Вагиз Галиулин Павел Погребнякни голли пас билан таъминлади ва ҳисоб очилди. Биринчи бўлим охирида уралликлар ҳисобни тенглаштирди, Владимир Ильин гол муаллифи.

59-дақиқада Погребняк пенальтидан гол уриб, жамоасини яна олдинга бошлади. Аммо 87-дақиқада Отман Эль-Кабир ҳисобни тенглаштирувчи голга муаллифлик қилди.

Эндиликда «Тосно» 24 очко билвн РФПЛ турнир жадвалида охиргидан олдинги ўринда, «Урал» 30 очкоси билан — тўққизинчи.

«Локомотив» эса «РЖД Арена» стадионида «Ростов» устидан кичик ғалабага эришди. Ўйиндаги ягона гол Жефферсон Фарфан томонидан 47-дақиқада урилди. Меҳмонлар сафида ўзбекистонлик Элдор Шомуродов иккинчи бўлимда захирадан туширилди. 

«Ростов» РФПЛда қаторасига бешинчи учрашувда ҳам мағлуб бўлди ва 27 очкоси билан турнир жадвалида 13-ўринда бормоқда, «Локомотив» 52 очкоси билан яккапешқадамликни давом эттирмоқда. 

Бу турда «Анжи» чемпионатнинг яна бир етакчи жамоаси «Спартак»ни қабул қилди. Маҳачқалъадаги «Анжи-Арена» стадионида кечган учрашув меҳмонларнинг 4:1 ҳисобидаги ғалабаси билан якунланди.

Ғолиблар сафида нидерландиялик ярим ҳимоячи Квинси Промес ҳет-трик қайд этди ва мавсум тўпурарлари рўйхатида биринчи ўринга кўтарилди (13 гол), москваликларнинг тўртинчи голи Илья Кутепов томонидан урилди. «Анжи» сафида Хуан Лескано битта жавоб голига муаллифлик қилди. Мезбонлар сафида Достон Ҳамдамов ўйинни илк дақиқалардан бошлаганди, аммо у танаффусда алмаштириб юборилди. 

Қаторасига тўртинчи ўйинда ғалаба қозонган «Спартак» (50 очко) «Локомотив»ни таъқиб қилишда давом этмоқда. «Темирйўлчилар» жамоасида битта захира ўйини ҳам мавжуд. «Анжи» 24 очко билан 14-ўринда қолмоқда.

Россия чемпионати
25-тур
Тосно – Урал 2:2 (1:1, 1:1)
Голлар: 1:0 – 6 Погребняк, 1:1 – 40 Ильин, 2:1 – 59, пенальти Погребняк, 2:2 – 87 Эль-Кабир.
Тосно – Юрченко, Маргасов, Дугалич, Сухарев, Чернов, Карницкий, Галиулин, Жигулев (Мелкадзе, 82), Полетанович, Мирзов (Рикардиньо, 62), Погребняк.
Урал – Годзюр, Кулаков, Балажиц, Чернов (Портнягин, 81), Меркулов, Емельянов, Майега, Димитров, Евсеев (Егорычев, 62), Эль-Кабир, Ильин.
Огоҳлантиришлар: Майега (36), Погребняк (36), Балажиц (68), Егорычев (72), Жигулев (72).

Локомотив – Ростов 1:0 (0:0, 1:0)
Гол: 1:0 – 47 Фарфан.
Локомотив – Гильерме, Игнатьев, Кверквелия, Чорлука, Рыбус, Коломейцев, Тарасов (Баринов, 83), Фарфан, Миранчук, Фернандеш, Ари (Эдер, 72).
Ростов – Абаев, Паршивлюк, Ингасон, Сигурдссон, Вилюш (Скопинцев, 71), Макеев, Калачев (Зуев, 84), Гацкан, Сапета, Дядюн (Шомуродов, 58), Ионов.
Огоҳлантиришлар: Фарфан (28), Рыбус (40), Калачев (64), Ионов (84), Ингасон (90), Эдер (90), Скопинцев (90), Гацкан (90).

Анжи – Спартак 1:4 (1:3, 0:1)
Голлар: 0:1 – 10 Промес, 0:2 – 14 Промес, 0:3 – 27, пенальти Промес, 1:3 – 36 Лескано, 1:4 – 56 Кутепов.
Анжи – Будаков, Данченко, Чансельор, Брызгалов, Яковлев, Маркелов (Хубулов, 46), Антон, Тетрашвили, Ҳамдамов (Мусалов, 46), Лескано, Будковский (Калмыков, 85).
Спартак – Селихов, Петкович, Максимович, Кутепов, Комбаров, Пашалич, Зобнин, Самедов, Ханни (Мельгарехо, 84), Промес, Луис Адриано (Зе Луиш, 77).