iPhone X смартфони Android’да ишловчи барча телефонлардан уч марта кўпроқ даромад келтирди

2017 йил охирги чорагида iPhone X смартфонларини сотишдан олинган даромад смартфонлар бозоридаги умумий даромаднинг 35 фоизини ташкил этган. Apple смартфонларининг сотилишидан олинган даромад эса Android’да ишловчи смартфонлар ишлаб чиқарувчи 600 дан кўпроқ компаниянинг даромадларидан 5 марта кўпроқ бўлган. Бундай маълумотлар Counterpoint Research компанияси тадқиқотида келтирилган.    

Apple флагман смартфони Android’да ишловчи қурилмалар ишлаб чиқарувчи компаниялар олган даромаддан 3 марта кўпроқ даромад келтирган. Энг сердаромад 10 та смартфондан 8 таси айфон бўлган: iPhone X’дан кейин 2-ўринни  iPhone 8, 3-ўринни iPhone 8 Plus эгаллаган. Шунингдек, етакчи бешталикка  iPhone 7 ва 7 Plus, ўнталикка iPhone 6, 6S ва SE кирган.

Тадқиқотга кўра, 2017 йил охирида смартфонлар бозоридаги 86 фоиз даромад Apple’га тегишли. 

Apple’нинг ҳисоботига кўра, компания 2017 йил 4-чорагида 52,6 млрд доллар тушум  олган (улардан 10,7 млрд доллари даромад) ва 46,7 млн дона айфон сотган.