Арманистон МХХ мамлакатда терактларнинг олди олингани ҳақида маълум қилди

Арманистон Миллий хавфсизлик хизмати мамлакатда терактлар содир этишни режалаштирган икки киши қўлга олингани ҳақида маълум қилди. Бу ҳақда маҳкама расмий сайтида хабар берилган.

МХХ маълумотларига кўра, Арманистоннинг икки фуқароси қўлга олинган мухолифатчи Жирайр Сефилян ҳамда «Сасна Црер» гуруҳи билан алоқадор бўлган бўлиб, жамоат жойларида қатор портлашлар содир этишни режалаштирган, бу қўрқув муҳитини юзага келтириш учун қилинмоқчи бўлинган.

Хусусан, портлашлар Еревандаги Озодлик майдонида, шаҳардаги савдо марказларининг бирида, кўприклар яқинида ва коммуникация йўллари, шунингдек аҳоли турар-жойлари яқинида режалаштирилган.

Эслатиб ўтамиз, аввалроқ Ереванда яна оммавий қўлга олишлар юз бергани хабар қилинганди.