1 август куни Москвадаги Balzi Rossi номли италянча ресторанда портлаш рўй берди. Миллий аксилтеррор қўмитаси номаълум аёл ичкарига олиб киришга уринган қўлбола бомба ҳаракатга келтирилганини маълум қилган. «Коммерсант» манбаси аниқлик киритишича, у курьер бўлган ва «совға» солинган қутини олиб келган. Бинога киришда уни қўриқчи тўхтатган ва шу онда қути портлаб кетган. Катта эҳтимол билан, курьер ўзи нима олиб келганидан бехабар бўлган, деб ёзади «Коммерсант». Нашрнинг қайд этишича, портлаш оқибатида аёлнинг танаси «том маънода сочилиб кетган».
Тахминларга кўра, ресторанда Ҳаво-космик кучлари бош қўмондони Александр Чайконинг юбилейи нишонланаётганди. У Россия Ҳаво-космик кучлари (ҳаво ҳужумидан мудофаа тизими учун ҳам масъул) раҳбарлигига у 2026 йил майида тайинланган, ундан олдин Суриядаги ҳарбий амалиётга бошчилик қилган, шунингдек, 2022 йилда рус қўшинларининг Киев областига юришини бошқарган. Киев области украинлар томонидан озод қилинганидан кейин тинч аҳоли вакиллари қийноққа солингани ва ўлдирилганига оид кўплаб далиллар топилади. Украина томони Чайкони Киев областидаги фуқаролик объектларини бомбалашга буйруқ беришда ҳам айблаган. У Balzi Rossi’даги зиёфатдан беш кун олдин 55 ёшга тўлганди. Хабарларга кўра, генерал гўёки ресторанда қўшалоқ байрам – ҳам туғилган куни, ҳам юқори лавозимга тайинланганини нишонламоқчи бўлганди.
Воқеа жойида уч киши ҳалок бўлган, яна икки киши шифохонада жон берган. Портлашдан кейин Миллий аксилтеррор қўмитаси 21 киши жароҳатлангани, курер, уни тўхтатиб қолган қўриқчи ҳамда ресторанга ташриф буюрганлардан бири (у портлаш вақтда верандада эди) ҳалок бўлганини маълум қилди. Кейинроқ яна икки киши шифохонада вафот этгани ҳақида хабар тарқалди. Россиянинг Италиядаги элчихонаси 3 август куни эълон қилган постда ҳам Balzi Rossi’да беш киши ҳалок бўлиб, 19 киши «жиддий жароҳат олгани» айтилади. Расмийлар ҳодисани теракт деб атаган, аммо унинг нишони айнан Чайко бўлганини тасдиқламаган.
Қурбонлар ҳақида расман маълумот йўқ. Норасмий хабарларда қурбонлар орасида Чайконинг куёви ҳам борлиги айтилади. «Верстка» хабарига кўра, жабрланганлардан бири генералнинг 25 ёшли қизи Мария Чайко бўлиши мумкин (турмуш ўртоғининг фамилияси бўйича Мария Передрий) – унинг номи кучишлатар тузилмаларга яқин бўлган телеграм-каналлар томонидан тарқатилган жабрланувчилар рўйхатида келтирилган. Рўйхатда Мариянинг турмуш ўртоғи, 27 ёшли Даниил Передрий ҳам бор. Блогер Анатолий Шарий маълумотига кўра, у «рафиқаси томон учиб келаётган осколка парчасини ўз танаси билан тўсган». Передрийнинг ўлими бўйича бошқа тафсилотлар йўқ. Генерал Чайконинг ҳолати ҳақида ҳам маълум қилинмаган.
