Марказий банк: 1-чорак якунлари бўйича ЯИМ ўсиши 5,1 фоизни ташкил қилди

Марказий банк 2018 йилнинг биринчи чорагидаги пул-кредит сиёсатининг шарҳини эълон қилди.

Шарҳга кўра, Ўзбекистон ЯИМ биринчи чоракда 5,1 фоизга ўсди, иқтисодиётга киритилган инвестициялар ҳажми - 29,4 фоизга, саноат маҳсулотлари ишлаб чиқариш ҳажми - 11,8 фоизга. Йил бошидан бери фаолият юритаётган корхоналар ва ташкилотлар сони 3,8 фоизга ошди.

Ташқи савдо айланмаси 7,9 млрд долларни ташкил этди. Миллий валютадаги пул массаси эса 2017 йилнинг биринчи чорагидаги 5,7% билан таққослаганда 1,7%га ошди. Марказий банк ижобий тенденциялар орасида истеъмол нархлари ўсиш суръатининг пасайганига ҳам эътибор қаратди.

Бундан ташқари, II чоракда Марказий банк қайта молиялаштириш ставкасини 14% даражада қолдирди. Шу билан бирга таъкидланишича: «Монетар омиллар таъсири остида иқтисодиётда инфляция хатарлари сезиларли даражада ошган тақдирда, Марказий банк пул-кредит шароитларини яхшилаш, шу жумладан банк тизимига ортиқча ликвидлиликни жалб қилиш бўйича бозор операцияларини ўтказиш орқали чора-тадбирлар кўради».