Грознийдаги черковга ҳужум вақтида ҳалок бўлган кишининг шахси аниқланди, деди журналистларга Махачкала ва Грозний Варлаам архиепископи.
"Бу Ўзбекистондан келган Артемий, у шу ерда яшарди, қариндошларини излаётганди. Бу ерда унинг яқинлари йўқ, шу боис унинг дафн маросими билан биз шуғулланамиз", - дея архиепископнинг сўзларини келтиради РИА "Новости".
Унинг сўзларига кўра, епархия шунингдек шифохонадаги жабрланганларга молиявий ва тиббий воситалар билан ёрдам кўрсатади.
Бундан ташқари, архиепископ патриарх Кирилл билан суҳбатлашгани ва у барча православларни тинчлик сақлашга чақирганини маълум қилди.
Куни кеча 4 нафар жангари Грозний марказидаги Архангел Михаил черковига бостириб кирган. Черковни қўриқлаётган 2 полициячи ва яна бир киши ҳужум қурбонига айланган. Шунингдек 2 нафар ҳуқуқ-тартибот органи ходими ҳам жабрланган.
Махсус операция натижасида ҳужум бартараф қилинган, уларнинг шахси аниқланган. Республика раҳбари Рамзон Қодировнинг айтишича, ҳужумни амалга оширганларнинг 2 нафари Грозний яқинидаги Гелдаган қишлоғида яшаган, гуруҳ раҳбари "қўшни минтақалардан бирининг фуқароси бўлган". Унинг сўзларига кўра, "жангарилар Ғарб мамлакатларидан бири томонидан берилган буйруқ асосида ҳаракат қилишганига доир маълумот бор".