Путин немис тилида журналистдан ўз сўзини бўлмасликни сўради

Россия президенти Владимир Путиннинг Австрияга тегишли ORF телеканалига берган интервьюсида, журналист бир неча маротаба унинг сўзини бўлиб қўйди. Россия етакчиси бунга жавобан сабр қилиш ва уни охиригача эшитишни сўради ҳамда немис тилига ўтиб кетди.

«Агарда сиз сабр қилиб, мени охиригача эшитсангиз, унда менинг бу масала бўйича фикримни билиб оласиз. Майлими?» - деган Путин. У журналистнинг Донбассда MH17 рейсини амалга оширган Boeing самолёти ҳалокати ҳақидаги саволига шундай реакция билдирган. Бошловчи Путиннинг жавобини охиригача эшитишга сабри чидамай, бу масала бўйича позициясини аниқлаштиришга уринган.

Путин Қримда Россия кучларининг 2014 йилдаги иштироки бўйича саволда ҳам ўз сўзини бўлмасликни сўраган. «Бир сония, менга жавоб қайтаришга имкон беринг. Сиз тўхтамасдан савол беришни хоҳлайсизми ёки менинг жавобларим ҳам қизиқтирадими?» - деган у.

Россия етакчиси охир-оқибат немис тилига ўтиб, суҳбатдошига ўз фикрини тушунтиришга ҳаракат қилган. «Менга жавоб қайтаришга имкон беринг. Seien Sie so nett, lassen Sie mich etwas sagen ("Менга нимадир айтишга имкон беринг")», - деган Путин.

Тўлиқ интервьюни ушбу ҳавола орқали кўришингиз мумкин. 

Эслатиб ўтамиз, аввалроқ Путин Россия Корея ярим оролидаги вазият яхшиланиши учун барчасига тайёр эканини билдирганди.