Орландода гаровга олинган барча болалар ўлик ҳолда топилди

Фото: AP /John Raoux

АҚШнинг Орландо шаҳрида тўрт нафар болани 12 соат давомида гаровда ушлаб турган эркак ўз жонига қасд қилди, болалар ўлик ҳолда топилган. Бу ҳақда CNN хабар бермоқда.

Таъкидланишича, болалар кеча, 11 июнь куни кечқурун ўлик ҳолда топилган.

Аввалроқ, эркак 1, 7, 10 ва 12 ёшдаги болаларни гаровга олиб, хонадонга яширингани хабар қилинганди.

Полицияга аёл киши мурожаат қилиб, таниши уни дўппослаганини айтган. Ҳуқуқни муҳофаза қилиш органи ходимлари эркакни қўлга олишга ҳаракат қилишганида, у ўт очди ва полициячилардан бирини жароҳатлади. Шундан сўнг эркак хонадонга яшириниб, болаларни гаровга олганди.