Ўзбекистон СССР давридаги пенсия ёшига эга бўлган ягона давлатга айланиши мумкин

Ўзбекистон СССР давридаги пенсия ёшига эга бўлган ягона давлат бўлишга яқинлашди - Россия Давлат думаси пенсия ёшини ошириш ҳақидаги қонун лойиҳасини биринчи ўқишда қабул қилди.

Давлат думаси ялпи мажлисида қонун лойиҳасини қабул қилиш учун 328 депутат овоз берди, 104 нафари қарши чиқди, бетараф қолганлар бўлмади. 

Россия ҳукумати пенсия ёшини 2019 йилдан 2034 йилгача аста-секин кўтариб боришни таклиф қилмоқда. Якунда эркакларнинг пенсияга чиқиши 60 дан 65 ёшга, аёлларники - 55 дан 63 ёшга оширилади.

Расмийларнинг маълум қилишича, бу, хусусан, пенсияларни инфляциядан ортиқ бўлган суръатда ошириш имконини беради.

Spot’нинг ёзишича, Ўзбекистон ва Россия - СССР даврида ўрнатилган пенсия ёши Собиқ иттифоқ макони давлатлари орасида сақланиб қолаётган ягона давлатлардир. Қолган барча мамлакатларда пенсия ислоҳоти ўтказилди.

Ҳозир Ўзбекистонда 3,3 млн.дан ортиқ киши (2018 йил 1 май ҳолатига кўра) пенсия ва нафақалар олади, улардан 103,1 минг киши (ёки 3,2 фоиз) ишловчи пенсионерлар ҳисобланади. Улар орасидан 26,7 минг киши (ишловчи пенсионерлар умумий сонидан 26 фоиз) пенсияни тўла ҳажмда олади.

2019 йил 1 январдан бошлаб ислоҳот лойиҳаси доирасида бюджетдан ташқари Пенсия жамғармаси томонидан ишлайдиган барча пенсионерларга пенсия тўлаш таклиф қилинмоқда.

Молия вазирлигининг дастлабки ҳисоб-китобларига кўра, бунинг учун 363 млрд сўм миқдорида қўшимча маблағ талаб этилади, улар фонд даромадларининг тўлиқлигини таъминлаш, шунингдек, фуқароларни ижтимоий суғурта тизимига жалб этиш ҳамда иш жойларини легаллаштириш орқали таъминланади.