АҚШ Туркия америкалик пастор Эндрю Брансонни озод қилгани сабабли Анқарага қарши киритган баъзи санкцияларини бекор қилиши мумкин. Бу ҳақда АҚШ давлат котиби Майк Помпео маълум қилди.
Аввалроқ Туркия ташқи ишлар вазири Мавлут Човушўғлу Анқарада Помпео билан ўтган музокараларда Вашингтон томонидан Анқарага қарши киритилган санкциялар бекор қилиниши ҳақидаги фикрга келинганини маълум қилган.
“Биз яқин орада бу масала бўйича қарор қабул қиламиз, бироқ баъзи санкциялар бевосита пастор Брансон билан боғлиқ бўлган ва мантиқан уларни энди бекор қилиш керак”, деб айтган Помпео.
Аввалроқ АҚШ президенти Дональд Трамп Туркия 2016 йилдаги давлат тўнтарувига уринишга алоқадорликда айбланган Брансон ҳибсда ушланиб турилгани учун Анқарага қарши “катта санкциялар” киритиш билан таҳдид қилган.
“АҚШ ажойиб насроний, оилапарвар ва ажойиб инсон пастор Эндрю Брансонни узоқ вақтдан бери ҳибсда ушлаб тургани учун Туркияга катта санкциялар киритади. У жуда азобланмоқда. Бу айбсиз инсон зудлик билан озод қилиниши керак”, деб ёзганди Трамп твиттерда.
