Назарбоев ҳаётдан нолишни яхши кўрадиган қозоғистонликларга қабристонга боришни маслаҳат берди

Қозоғистон президенти Нурсултон Назарбоев ҳаётдан нолишни яхши кўрадиган фуқароларга қабристонга боришни маслаҳат берди. Бу ҳақда у 28 ноябрь куни Остонадаги VIII Фуқаролик форумида сўзлаган нутқида айтди.

Республика раҳбарининг сўзларига кўра, у ҳаётий қийинчиликлар ёки жисмоний камчиликларга қарамай, таслим бўлмайдиган, ривожланишда давом этадиган одамлардан илҳомланади.

«Биз тез-тез ҳаётдан шикоят қиламиз: у етмаяпти, бу етмаяпти. Агар ҳаёт ҳақиқатдан ҳам оғирлашса, касалхоналарга бориб кўринг. Қабристонга бориб кўринг. У ерда ётганларга сендан кўра ёмонроқ. Биз эса қўл-оёқларимиз бўлиб турибди, сочимизни юламиз: «Қанчалик ҳаммаси оғирлашиб кетди». Бу нотўғри. Ҳаётда ҳамма нарса бўлиши мумкин. Ўзингизни қўлга олиб, ишланг. Ёшлар бунга ўрганиши керак», - дея таъкидлаб ўтди у.

Эслатиб ўтамиз, аввалроқ Назарбоев 15 ёшгача тўйиб овқатланмагани ҳақида маълум қилганди.